Zańsyz saqtalǵan qarýlardy tapsyrǵan turǵyndar syıaqy aldy - SQO
SQO polıtsııa departamenti baspasóz qyzmetiniń málimetinshe, tapsyrylǵan qarýlar qylmystardy jasaýǵa qoldanbaǵandyǵyn rastaıtyn qajetti saraptamalardan ótedi. Sondaı-aq saraptama qarýdyń qaı sanatqa jatatynyn anyqtap, soǵan qaraı syıaqy belgilenedi.
Aktsııa sharttaryna sáıkes, qarý qylmysqa qatysy joq «taza» bolsa, polıtseıler qarýdyń qaıdan kelgeni jaıly aıtýǵa mindettemeıdi. Degenmen, adamdar olardy qaıdan alǵany jaıly túsinik berip jatady. Kóp jaǵdaıda qarý-jaraq ormannan nemese Esil ózeniniń jaıylmasynan tabylǵan. Eki adam ańshy qarýyn úılerindegi eski qora-qopsyny buzǵan kezde taýyp alǵan. Úsh adam qarýdyń qaıtys bolǵan ákelerinen qalǵanyn aıtqan.
Mysalǵa, aýdan ortalyǵy Býlaevonyń turǵyny 1995 jyldan bastap «BM-16» qosaýyzdy qarýdy ákesiniń kózi retinde saqtaǵan. Endi bir jaǵdaıda Taıynsha aýdanynyń turǵyny Polshaǵa turaqty turýǵa ketken dosy qaldyryp ketken 16 kalıbrli «IJ» markaly 2 qarýdy ózinde eki jylǵa jýyq saqtaǵan.
«Qarýdy zańsyz saqtaý – bul óz basyńdy táýekelge tigý. Retsiz paıdalanǵan jaǵdaıda ol ólimge sebep bolýy nemese qylmyskerlerdiń qolyna túsýi de múmkin. Qarýdy mindetti túrde tapsyrǵan jón. Erikti túrde tapsyrǵan jaǵdaıda ákimshilik pen qylmystyq jaýapkershilikten
bosatylady», - deıdi SQO PD ákimshilik polıtsııa basqarmasynyń erekshe tapsyrmalar jónindegi aǵa ınspektory Qurman Mýsın.
Aktsııa aıasynda soltústikqazaqstandyqtar barlyǵy 5 travmatıkalyq qarý, 16 tegis uńǵyly qarý men kalıbri 5,6 mm «TOZ» markaly 2 oıyq usaq kalıbrli vıntovka tapsyrǵan.