Zańsyz oıyn bıznesiniń kóleńkeli aınalymynan 68,5 mln. teńge alyndy - Qarjy polıtsııasy
ASTANA. 19 sáýir. QazAqparat - Qarjy polıtsııasy 700 zańsyz oıyn mekemeleriniń qyzmetin áshkerelep, kóleńkeli aınalymnan 68,5 mln. teńgeni aldy.
Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.
Resmı ókildiń aıtýynsha, memlekettiń ekonomıkalyq qaýipsizdigine «kóleńkeli» ekonomıka barynsha qaýip tóndiredi. Sondyqtan, «kóleńkeli» ekonomıkanyń quramdas bóligi bolyp tabylatyn zańsyz oıyn bıznesine qarsy turý qarjy polıtsııasy organdarynyń mańyzdy mindeti bolyp tabylady. Toqtala ketetin jaıt, qazirgi tańda kazıno men oıyn avtomattary Qapshaǵaı sý qoımasy jaǵalaýy men Aqmola oblysy Şýche aýdanynda ornalasýǵa tıis. Belgilengen oryndardan tys jerde jumys isteıtin oıyn mekemleriniń qyzmeti zańsyz.
«2010 jyldan bastap qarjy polıtsııasy organdarymen ótkizilgen reıdterdiń ntıjesinde 700 zańsyz oıyn mekemeleriniń qyzmeti áshkerelendi. Kóleńkeli aınalymnan 68,5 mln. teńge, 7704 oıyn avtomattary, 82 rýletka, kartalyq oıyndarǵa arnalǵan 131 ústel alyndy», - deıdi Murat Jumanbaı.
Onyń aıtýynsha, 2010 jyldyń 25 qarashasynda Qylmystyq kodekstiń 269-1 baby kúshine engen. Soǵan sáıkes, qylmystyq jaýapkershilikke tartý úshin zańsyz óndirilgen tabystyń somasyn belgileý qajet bolyp tabylmaıdy. «Bul zańsyz oıyn bıznesiniń jolyn tıimdi kesýge jáne jasyryn oıyn mekemelerin uıymdastyrýshylardy qylmystyq jaýapkershilikke tartýǵa múmkindik beredi», - deıdi M. Jumanbaı.
