Zańsyz oıyn bıznesin ashqan qostanaılyq sottalýy múmkin
QOSTANAI. QazAqparat - Qostanaı oblysynda zańsyz oıyn bıznesin ashqan 27 jastaǵy jigitke qatysty sot otyrysy ótedi, dep habarlaıdy QazAqparat tilshisi oblystyq sottyń baspasóz qyzmetine silteme jasap.
Qostanaı qalasynyń №2 sotyna QR QK 307-baby 2-bóligi, 2-tarmaǵy boıynsha (oıyn mekemesin zańsyz ashý ne ustaý nemese oıyn bıznesi salasyndaǵy qyzmetti zańsyz uıymdastyrý) aıyptalǵan 1990 jyly týǵan oblys turǵyny K.-ge qatysty qylmystyq is tústi.
Іs materıaldaryna súıensek, K. 2016 jyldyń tamyzynan jeltoqsan aıy aralyǵynda Qazaqstan Respýblıkasynyń «Oıyn bıznesi týraly» 2007 jylǵy 12 qańtardaǵy zańyna qaıshy áreketke baryp, KSK shaǵyn aýdanynda oıyn bıznesin uıymdastyrǵan. Onyń bul iske jalǵyz barmaǵany belgili bolyp otyr. Ol shaǵyn aýdandaǵy eki oryndy lotereıa oıyny retinde ashqanyn aıtady. Tergeý isi 27 jastaǵy turǵynnyń aldyn ala kelisý arqyly belgisiz bir toppen jumys istegenin anyqtady.
Negizgi sot otyrysy 18 qazanda saǵat 15-00-de bolady.
