Zańsyz oıyn bıznesi Almaty, Ońtústik Qazaqstan, Jambyl jáne Qyzylorda oblystarynda órship tur
ASTANA. QazAqparat - Zańsyz oıyn bıznesi Almaty, Ońtústik Qazaqstan, Jambyl jáne Qyzylorda oblystarynda órship tur. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Qarjy mınıstrligi Memlekettik kirister komıtetiniń tóraǵasy Dáýlet Erǵojın málim etti.
«Biz Qazaqstannyń jalǵan aqsha kýpıýralary men belgilerin daıyndaýmen aınalysatyn 5 qylmystyq toptyń qyzmetin tyıdyq. 2047 jalǵan aqsha kýpıýrasy alyndy, 21 jasyryn kazıno, 63 onlaın-kazıno, 40 oıyn avtomaty zaly anyqtalyp, 540 oıyn avtomaty, 566 termınal, 18 pokker ústeli tárkilendi», - dedi D.Erǵojın.
Onyń sózine qaraǵanda, zańsyz oıyn bıznesi Almaty, Ońtústik Qazaqstan, Jambyl jáne Qyzylorda oblystarynda shoǵyrlanǵan.
«Bul oblystarda mundaı zańsyz bıznes eń kóp anyqtalyp otyr. Zańsyz bıznestiń keńinen taralýy, tipti, bizderdiń Astanada, «Shubar» shaǵynaýdanynda da tabylýy dálel bolady. Atalǵan iske qatysty barlyq tulǵa anyqtaldy», - dedi ol.
Komıtet tóraǵasynyń aıtýynsha, munan bólek, alkogol ónimderin zańsyz óndirý jáne satýǵa qatysty 152 qylmystyq is qozǵalyp, 6 mıllıonǵa jýyq jalǵan esepke alý-baqylaý markasy, 5 mln. shólmek esepke alynbaǵan alkogol ónimi, 69 myń lıtr spırt tárkilengen.
