Zańsyz munaı satqan Almaty turǵyny 5 jylǵa sottaldy
ALMATY. QazAqparat – Almatyda «MSG Company» JShS-niń basshysy munaı ónimderin zańsyz saqtady jáne satty degen aıyppen sottaldy, dep habarlaıdy QazAqparat tilshisi.
Ekonomıkalyq tergeý departamentiniń málimetinshe, «MSG Company» JShS basshysy zańsyz árekettermen aınalysqan. Ol jalpy somasy 896,5 mln teńgege 13,5 myń tonna munaı men munaı ónimderin (mazýt) satýmen aınalysqan.
«Seriktestiktiń zańsyz áreketi salyq pen bıýdjetke mindetti tólemderdi tólemeý túrinde memleketke 249,1 mln teńge materıaldyq zalal keltirdi», - delingen habarlamada.
Sot úkimine sáıkes, aıyptalýshy QRQK 197-baptyń 4-bóligi ( munaı ónimderin zańsyz saqtaý,satý jáne qujatsyz óndirý, tasymaldaý ) jáne 245-baptyń 3-bóligi ( salyq pen bıýdjetke mindetti tólemderdi tóleýden jaltarý) boıynsha kináli dep tanyldy.
Sot ony bes jylǵa bas bostandyǵynan aıyrdy.
