Zańsyz memlekettik satyp alýlardy toqtatý arqyly 165 mln teńge únemdeldi
ASTANA. QazAqparat - 2016-2017 jyldary Astanada zańsyz memlekettik satyp alý baıqaýlaryn toqtatý arqyly 165 mln teńge kólemindegi bıýdjet qarajaty únemdeldi, dep habarlaıdy QazAqparat tilshisi.
Bul týraly Astana qalalyq kásipkerler palatasynyń sarapshysy Serik Mujyqov Kásipkerler quqyǵyn qorǵaý jáne sybaılas jemqorlyqqa qarsy qarsy is-qımyl keńesiniń kezekti otyrysynda málim etti.
«Astana qalalyq prokýratýrasy keltirgen derekterge sáıkes, 2016-2017 jyldary memlekettik satyp alýlar salasyna 7 tekserý júrgizilip, 49 zańbuzýshylyq anyqtalǵan jáne 42 laýazymdy tulǵa jaýapqa tartylǵan. Prokýrorlyq jaýap berý aktileri boıynsha zańsyz júrgizilgen baıqaýlardy toqtatý arqyly 165 mln teńge kólemindegi bıýdjet shyǵynyna jol berilmedi», - dep atap ótti S. Mujyqov.
Máselen, Astana ákimdiginiń qyzmetine tekserý júrgizý barysynda memlekettik satyp alýlar rásimin júzege asyrýda eleýli zańbuzýshylyqtar tabylǵan jáne jylytatyn aıaldama pavılondaryn ornatýda qarajatty negizsiz jumsaý faktileri anyqtalǵan.
«Osylaısha, qalalyq prokýratýra zańdy buzǵany úshin (QR Memlekettik satyp alýlar týraly zańy) Astana qalasy Jolaýshylar kóligi basqarmasynyń basshysyn, qalalyq Avtomobıl joldary jáne Ekonomıka jáne bıýdjettik josparlaý basqarmalarynyń laýazymdy tulǵalaryn jaýapqa tartty», - dep tolyqtyrdy palata ókili.
Sarapshy memlekettik satyp alýlardyń bıýdjettik qarajattan qarjylandyrylatynyn jáne memlekettik satyp alýlardy júzege asyratyn aqshany tımdi jumsaý, jetkizýshiler arasyndaǵy ádil básekelestik, memlekettik satyp alýlardy júrgizý protsesiniń ashyqtyǵy ustanymdaryna negizdeletinin atap ótti.
«Osyǵan baılanysty, Keńes atynan (Astana qalasynyń kásipkerler palatasy Kásipkerler quqyǵyn qorǵaý jáne sybaılas jemqorlyqqa qarsy qarsy is-qımyl keńesi - red.) «Atameken» ulttyq kásipkerler palatasynan Memlekettik satyp alýlar týraly zańnamaǵa ózgerister engizýdi, atap aıtqanda zańnamany buzǵan laýazymdy tulǵalar úshin jaýapkershilikti qatańdatýdy, kásipkerdi memlekettik satyp alýlar júıesine qatysý quqyǵynan aıyrý jazasyn sot sheshimimen ǵana oryndaýdy, memlekettik satyp alýlar daýyn sotqa deıingi tártipte sheshýdi usynamyz», - dep óz sózin túıindedi S.Mujyqov.
