Zańsyz qyzmet etken tórt medrese jabyldy
ASTANA. QazAqparat - Qyrǵyzstanda zańsyz bilim berýmen aınalysqan 4 medrese qyzmetine tyıym salyndy.
Bul týraly Qyrǵyz musylmandary dinı basqarmasy ókili Kýshtarbek Mamatov málimdedi, dep habarlaıdy muslim.kz.
Onyń aıtýynsha, atalǵan oqý oryndary balalarǵa bilim beretin talap-sharttardy saqtamastan jáne zańdyq ruqsat qujatynsyz jumys istegen. Olardyń oqý úderisi meshit ǵımarattarynda júrgizilgen. «Biz osyǵan deıin olardy tekserip, eskertý jasadyq. Medreselerdiń arnaıy ǵımarattary bolmaǵan, meshitte sabaq júrgizgen. Biz olarǵa zań normalaryn túsindirip, erejelerdi kórsettik»,- deıdi K.Mamatov.
Buǵan deıin Bishkek qalasy Іshki ister departamenti, kámelettik jasqa tolmaǵan balalar isi jónindegi ınspektsııa, mýftııat, aýdan ákimdigi men basqa da memlekettik organ ókilderinen turatyn komıssııa dinı bilim berý mekemelerin aralaǵan. Tekseris nátıjesinde birqatar medreselerde tehnıkalyq qaýipsizdik erejeleri men sanıtarlyq normalardyń saqtalmaǵany anyqtaldy.
Resmı derekterge súıensek, qazirgi kúnde Qyrǵyzstanda 102 medrese bar. Olardyń basym bóligi tirkeýden ótken jáne qyzmetin zań aıasynda júrgizip keledi.
