Zańsyz qýylǵan medbıke sot sheshimimen jumysqa qaıta alyndy

ASTANA. QazAqparat - Aqmola oblysy Bulandy aýdandyq soty jumysqa qaıta alý jáne amalsyz bos júrgen ýaqyty úshin eńbekaqyny óndirip alý týraly Psıhonevrologııalyq aýrýlary bar múgedekterge arnalǵan medıtsınalyq-áleýmettik mekemesiniń burynǵy bas medbıkesiniń talap aryzy boıynsha azamattyq isti qarady.

Sot anyqtaǵandaı, azamatsha I. 2016 jyldyń 3 qańtarynan bastap Psıhonevrologııalyq aýrýlary bar múgedekterge arnalǵan medıtsınalyq-áleýmettik mekemesinde bas medbıke qyzmetin atqarǵan. Jumys isteý kezeńinde ol tártiptik jazalarǵa tartylǵan. 2015 jyldyń 15 jeltoqsanynda sanıtarlyq-epıdemıologııalyq normalardy buzǵany úshin oǵan eskertý jasaldy. 2015 jyldyń 28 qańtarynda tártiptik jaza sógis túrinde, 2016 jyldyń 20 qańtarynda gıgıenalyq zattardy durys bermegeni úshin qatań sógis jarııalanǵan. 2016 jyldyń 2 maýsymynda medbıke jumys berýshi tarapynan jumystan shyǵaryldy.

Sot medbıke jasaǵan tártip buzýshylyqtar eleýli emestigin, júıeli túrde jasalmaǵanyn jáne jumystan bosatýǵa negiz bola almaıtynyn anyqtady.

Sot sheshimimen jumysqa qaıta alý jáne amalsyz bos júrgen ýaqyty úshin eńbekaqyny óndirip alý týraly medıtsınalyq-áleýmettik mekemesiniń burynǵy bas medbıkesiniń talap aryzy qanaǵattandyryldy. Azamatsha I-diń medıtsınalyq-áleýmettik mekemesiniń dırektorymen jasalǵan eńbek shartynyń buzylý týraly buıryǵynyń kúshi joıyldy. Azamatsha I. jumysqa qaıta alyndy. Sonymen qatar, sot jumys berýshiden azamatsha I-diń paıdasyna amalsyz bos júrgen ýaqyty úshin eńbekaqyny óndirip aldy.

Sot sheshimimen azamatsha I-di jumysqa qaıta alý jáne eńbekaqyny óndirip alý týraly bóliginde dereý oryndalýy tıis.