Zańsyz quraldarmen balyq aýlaýǵa salynatyn aıyppul ulǵaıady

NUR-SULTAN. QazAqparat – Tyıym salynǵan quraldarmen balyq aýlaýǵa qarastyrylǵan aıyppul kólemi ulǵaıady, ıaǵnı 20 AEK-ten (63 600 teńge) 50 AEK-ke (159 000 teńge) deıin kóterý kózdelip otyr. Bul týraly Balyq sharýashylyǵy komıteti tóraǵasynyń orynbasary Aıan Bahııanov málim etti, dep habarlaıdy QazAqparat tilshisi.

«Inspektsııa qyzmetekrleri saýda oryndarynda zańsyz tasymaldanǵan nemese satylatyn aý quraldaryn tárkileý boıynsha jumystar júrgizip turady. Osyndaı áreketke barǵan azamattarǵa 25 AEK (76 575 teńge) kóleminde aıyppul salynady. Sonymen qatar, mınıstrlik QR Ákimshilik quqyq buzýshylyq týraly kodeksine ózgeris engizýdi usyndy. Osy zań jobasy aıasynda tyıym salynǵan quraldarmen balyq aýlaǵan adamdarǵa qoldanylatyn shara kúsheıtiledi. Atap aıtqanda, kórsetilgen zań buzýshylyq úshin aıyppul kólemin 20 AEK-ten (63 600 teńgeden) 20 AEK-ke (159 000 teńgege) deıin kóterý kózdelip otyr», - dedi Aıan Bahııanov.

Engiziletin tolyqtyrýlardyń taǵy biri – eger ákimshilik jazaǵa tartylǵan adam bir jyl ishinde qaıtadan zań buzýshylyq jasasa, onda ol qamaýǵa alynady. Aıan Bahııanovtyń málimetinshe, tárkilengen zańsyz aý quraldary men balyq sany 50 danadan kóp bolsa, ondaı adamdy qylmystyq jazaǵa tartý máselesi talqylanyp jatyr.