Zańsyz qoqys tastaıtyndarǵa aıyppuldy kóbeıtý qajet - Toqaev
NUR-SULTAN. QazAqparat – Elordanyń tóńiregine zańsyz qoqys tastaıtyndarǵa salynatyn aıyppuldy kóterý qajet. Bul týraly elordany odan ary damytý máseleleri jónindegi májiliste Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Elordadaǵy kúrdeli problemalardyń biri qoqystardy jınaýdyń zańsyz oryndary bolyp otyr. Óte mańyzdy másele. Elordanyń tóńiregi nemese Aqmola oblysynyń taıaý jatqan aýmaǵy qurylys qoqystaryn jınaýdyń negizgi ornyna aınalǵan», - dedi Memleket basshysy.
Osyǵan oraı, QR Prezıdenti birqatar naqty tapsyrma berdi.
«Oryn alyp otyrǵan jaıtqa baılanysty Ekologııa, geologııa jáne tabıǵı resýrstar mınıstrligine qoqystardy zańsyz jınaǵany úshin jazanyń ákimshilik sharalaryn qatańdatý boıynsha sharalar qabyldaýdy tapsyramyn. Bul rette azamattarymyzdyń da turmystyq mádenıeti bolýy tıis. Turmysta, páterde, podezde ózderin durys ustamaıdy. Olar astanalyq sııaqty emes, qalalyq órkenıetke eshqandaı qatysy joq adamdar sııaqty. Osyǵan oraı, túsindirý jumystary bolýy qajet», - dedi Qasym-Jomart Toqaev ákimdikke qarata aıtqan sózinde.
Prezıdent qurylys qaldyqtaryn jınap, qaıda óńdeıtin nysannyń qurylysyn qamtamasyz etýdi tapsyrdy.
