Zańsyz qarasora jınaǵandardyń árqaısysy úsh jylǵa sottaldy - BQO
ORAL. QazAqparat - BQO qylmystyq ister jónindegi mamandandyrylǵan aýdanaralyq sotynyń úkimimen A.Rıabtsev, B.Tárjimanov, Q.Tasmuratov, N.Kýzbeev QR QK 296-baby 4-bóligimen aıypty dep tanylyp, árqaısysy úsh jyl bas bostandyǵynan aıyrý jazasyn jalpy tártiptegi túzeý mekemesinde óteýge sottaldy.
BQO sotynyń baspasóz qyzmetinen túsken málimetke qaraǵanda, oǵan qosa Rıabtsev, Tárjimanov, Kýzbeev jazasyn óteý oryndarynda esirtkiden májbúrli túrde emdeletin bolady.
Sot talqysynda belgili bolǵanyndaı, 2014 jyldyń qyrkúıeginde A.Rıabtsev, B.Tárjimanov, Q.Tasmuratov, N.Kýzbeev «Volkswagen Golf 3» avtokóligimen qarasora ósimdigin zańsyz jınaý maqsatynda Zelenov aýdany Ozernoe aýylynan 7 shaqyrym qashyqtyqta ornalasqan Kırsanov qoryǵynyń orman alqabyna barǵan. Sodan qarasorany polımerlik qaptar men sporttyq sómkege salyp, jınaý barysynda ustalǵan. Sonymen birge olardy tintý kezinde qaǵazǵa oralǵan keptirilgen marıhýana tabylǵan.
Іsti qaraý barysynda memlekettik aıyptaýshy sottalýshylar B.Tárjimanov, Q.Tasmuratov, N.Kýzbeevke qatysty QR QK 259 babynyń 3-bóliginiń «a, v» tarmaqtary boıynsha aıyptaýdy 296-babynyń 4-bóligine, ıaǵnı esirtki zattaryn satý maqsatynsyz kóp mólsherde zańsyz ıemdenip alý jáne saqtaý boıynsha ózgertti. Sondyqtan sot QR QІJK 337-babynyń 7-bóligine sáıkes atalǵan sottalýshylarǵa qatysty isti jańa aıyptaý boıynsha qarady. Sot sonymen qatar sottalýshynyń satý maqsatynda zańsyz esirtki zatyn saqtaǵany týraly dálelderdi aıyptaýshy taraptyń usynbaýyna jáne is materıaldarynda bolmaýyna baılanysty A.Rıabtsevtiń áreketin QR QK 296-baby 4-bóligi boıynsha qaıta dárejeledi.
