Zańsyz elik atqan memlekettik ınspektor ustaldy
ASTANA. QazAqparat - «Buırataý» memlekettik ulttyq tabıǵı parkiniń memlekettik ınspektory elikti zańsyz atqany úshin ustaldy. Bul jaıynda QR Aýyl sharýashylyǵy mınıstrliginiń baspasóz qyzmetinen málim etti, dep habarlaıdy QazAqparat.
«Sapsan» jedel toby «Buırataý» memlekettik ulttyq tabıǵı parki aýmaǵynda GAZ-69 avtokóligin ustady. Avtokóliktiń ıesi jáne júrgizýshisi «Buırataý» MUTP-niń memlekettik ınspektory ekendigi anyqtaldy. Avtokólikti tekserý barysynda 16 kalıbrli myltyq, basy kesilgen elik, jaryq izdegish, dúrbi, «Buırataý» degen jazýy bar radıoqabyldaǵysh tárkilendi», - delingen mınıstrliktiń aqparatynda.
Aıta keterligi, «Sapasan» jedel toby QR Aýyl sharýashylyǵy mınıstrligi Orman sharýashylyǵy jáne janýarlar dúnıesi komıtetiniń aýmaqtyq bólimderi men vedomstvolyq uıymdaryna ishki baqylaýdy júzege asyrý úshin qurylǵan. Jedel toptyń negizgi mindetteri - janýarlar dúnıesin, orman sharýashylyǵyn jáne erekshe qorǵalatyn tabıǵı aýmaqtardy qorǵaý, ósimin molaıtý jáne paıdalaný salasyndaǵy memlekettik baqylaýdy jáne qadaǵalaýdy júzege asyrý jáne qajet bolǵan jaǵdaıda laýazymdy tulǵalardyń osy salalarda quqyq buzýshylyqtaryn anyqtaý nemese jolyn kesý bolyp tabylady.
Jedel top 12 adamnan turady, 4 avtokólikpen, zamanaýı baılanys quraldarymen, sonyń ishinde spýtnıktik baılanyspen, birkelki kıimmen jáne servıstik qarýmen jabdyqtalǵan.
