Zańsyz bılet satýǵa qandaı tosqaýyldar qoıylmaq

ASTANA. QazAqparat - «Qazaqstan temirjoly» ulttyq kompanııasyna qarasty «Jolaýshylar tasymaly» AQ bılet satýdyń jańa júıesin engizbekshi. Alaıda QR Memlekettik qyzmet isteri jáne sybaılas jemqorlyqqa qarsy is-qımyl agenttigi atalǵan júıeni erterek engizýdi talap etip otyr, dep xabarlaıdy QazAqparat tilshisi.

Agenttiktiń jemqorlyqqa qarsy saıasat departamentiniń dırektory Danııar Sabyrbaevtyń aıtýynsha, jazǵa qaraı jolaýshylar tasymaly salasynda qarbalas bastalady. Soǵan deıin jańa júıeni iske qospasa, bıletterdi zańsyz satý áreketteri taǵy órship ketedi. «Alypsatarlar taǵy aqsha jasaıdy. Sondyqtan jańa júıeni jazǵa deıin engizgen jón», - dedi D.Sabyrbaev Astanada ótken baspasóz máslıxatynda.

«Jolaýshylar tasymaly» AQ bas dırektorynyń orynbasary Danııar Nurmaǵambetov sózine qaraǵanda, eski júıeni qysqa ýaqyttyń ishinde ózgertý múmkin emes. Óıtkeni búginde ASÝ «Ekspress» júıesin TMD elderiniń bári qoldanady.

«Demek, Reseı jáne taǵy basqa baǵyttarda bıletterdi kedergisiz satý úshin jańa júıeni ASÝ «Ekspress» júıesimen ıntegratsııalaý qajet. Oǵan ýaqyt kerek. Biz osy saladaǵy jyldam jasaı almaımyz. Ony sapaly túrde isteý kerek. Ókinishke qaraı, jazǵa deıin úlgere almaımyz. Degenmen, aǵymdaǵy jyldyń aıaǵyna deıin pılottyq jobany iske asyramyz. Jańa júıe boıynsha bir adamǵa kóp bılet satylmaıdy. Ondaıǵa avtomatty túrde shekteý qoıylady. Bılet satyp alý jáne poıyzǵa otyrý tártibi de jeńildeıdi. Jolaýshy jeke kýáligin kórsetedi de, poıyzǵa mine beredi», - deıdi D.Nurmaǵambetov.

Alaıda D.Sabyrbaev jazǵa deıin zańsyz bılet satýdy basqasha azaıtýdy usyndy. Onyń oıynsha, 45 kún buryn bos bıletterdiń bárin erkin satylymǵa shyǵarýǵa tyıym salý qajet. Aldymen bıletterdiń 10 protsentin, al 30 kún qalǵanda taǵy 15-20 protsentin satylymǵa shyǵarýǵa bolady.

«Bıletterdi erkin satylymǵa birtindep shyǵarý qajet. Sonda alypsatarlar barlyǵyn satyp alyp úlgermeıdi. Jańa júıeni jazǵa deıin engizýge úlgermesek, solaı isteıik», - dep atap kórsetti D.Sabyrbaev. «Jolaýshylar tasymaly» AQ bas dırektorynyń orynbasary D.Nurmaǵambetov atalǵan usynyspen kelisti.

Aıta keteıik, QR Memlekettik qyzmet isteri jáne sybaılas jemqorlyqqa qarsy is-qımyl agenttigi temirjol bıletterin zańsyz satý salasyndaǵy tekseristiń nátıjesin jarııalady. Budan bólek, temirjolmen jolaýshylardy tasymaldaý salasynda bes birdeı oblysty qamtyǵan qylmystyq sxema áshkerelendi.