Zańsyz baıyǵandar jaýapqa tartylýy múmkin - A. Lýkın
ASTANA. 16 sáýir. QazAqparat - Elimizde zańsyz jolmen baıyǵandardy qylmystyq jaýapkershilikke tartý týraly másele qaralýy múmkin.
Búgin Astanada ótip jatqan «Sybaılas jemqorlyqtyń aldyn alý boıynsha sharalardy, strategııalardy jasaý jáne iske asyrý salasynda tájirıbe almasý» atty halyqaralyq semınarda Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary Andreı Lýkın osylaı málimdedi.
Qarjy polıtsııasy ókiliniń aıtýynsha, Qazaqstan 2008 jyly BUU Sybaılas jemqorlyqqa qarsy konventsııasyn ratıfıkatsııalaǵan bolatyn. «Bul Konventsııada kez kelgen memleketke tán bolatyn halyqaralyq standarttar qamtylǵan. Al bul standarttarǵa sáıkes bolý úshin úkimettik emes uıymdarmen, halyqaralyq uıymdarmen, onyń ishinde Ekonomıkalyq yntymaqtastyq jáne damý uıymymen jumys jasap jatyrmyz. Budan bólek, Qazaqstanǵa qatysty belgili bir monıtorıngileý sharalary júrgizilip, soǵan sáıkes sybaılas tıisti usynystar jasap turady. Atap ótsek, sybaılas jemqorlyqqa qarsy kúres boıynsha tıisti ózgerister engizý», - dedi A. Lýkın.
Onyń sózine qaraǵanda, atalǵan usynystar negizinen jekelegen memlekettik organdarǵa, Úkimetke joldanyp, onda jemqorlyq kórinisterin tómendetý, zańnamalarǵa belgili bir uǵymdardy engizý týraly aıtylǵan. «Atap aıtqanda, BUU konventsııasynda kórsetilgenindeı, Qazaqstan zańsyz baıyǵany úshin qylmystyq jaýapkershilik engizý máselesin qarastyrý kerek. Budan bólek, para usynǵany jáne alǵany úshin qylmystyq jaýapkershilik te kózdelýi shart», - dedi A. Lýkın.
Onyń aıtýynsha, BUU konventsııasy aıasynda Qazaqstanǵa 37 usynym jasalǵan. «Bul máselelerdiń barlyǵy qarastyrylyp jatyr, perspektıvalyq josparlarǵa da enip otyr. Ondaı usynymdardyń barlyǵy derlik oryndalatyn bolady», - dedi A. Lýkın.
