Zańsyz balyq aýlaǵandarǵa qylmystyq jaza jeńildetilmeıdi – Ekologııa mıınstrligi
«QR Qylmystyq kodeksiniń 335-babyna sáıkes balyq resýrstaryn jáne basqa da sý janýarlaryn zańsyz aýlaǵany jáne aıtarlyqtaı zalal keltirilgen jaǵdaıda, sondaı-aq jarylǵysh nemese hımııalyq zattardy, elektr toǵyn nemese balyq resýrstary men basqa da sý janýarlaryn jappaı joıýdyń ózge de tásilderin qoldanǵany úshin qylmystyq jaýapkershilik kózdelgen. Óz kezeginde, atalǵan bappen zańsyz balyq aýlaý úshin qarastyrylǵan jaza túri Qylmystyq kodekstiń 337-babymen zańsyz ań aýlaý úshin qarastyrylǵan jaza túrimen mólsherles ekenin atap ótken jón. 2020 jyly Balyq sharýashylyǵy komıtetiniń aýmaqtyq ınspektsııalary qylmystyq jaýapkershilikti kózdeıtin zańsyz balyq aýlaýdyń 49 faktisin, al 2021 jyly osyndaı 74 faktini anyqtady», -dedi ol jaýabynda.
Onyń sózine qaraǵanda, jeke tulǵalar zańnamamen kózdelgen qylmystyq jaýapkershilikke qaramastan, balyq resýrstaryn zańsyz aýlaýdy jalǵastyrýda. Sondyqtan qylmystyq jazany jeńildetý zańsyz balyq aýlaý faktileriniń ulǵaıýyna ákelýi múmkin. Sonymen qatar, 2006 jyldan bastap sý aıdyndary jáne (nemese) ýchaskeleri tabıǵat paıdalanýshylarǵa bekitilip keledi jáne balyq sharýashylyǵyn damytýǵa, olardy qorǵaýǵa, ósimin molaıtýǵa jáne ǵylymı zertteýler júrgizýge, sondaı-aq qosymsha ınvestıtsııalar tartýǵa múmkindik beredi.
«Qazirgi ýaqytta Jaıyq-Kaspıı basseıni boıynsha 50-ge jýyq balyq sharýashylyǵy sýbektilerine kásipshilik balyq aýlaýdy júzege asyrý úshin 60 balyq sharýashylyǵy sý aıdyndary nemese ýchaskeleri bekitilip berilgen jáne olar jyl saıyn shamamen 13 myń tonna balyq aýlaıdy. Osylaısha, qazirgi ýaqytta balyqshylar tabıǵat paıdalanýshylarǵa jumysqa turyp, arnaıy ruqsat qaǵazdaryn ala otyryp, balyq aýlaýmen zańdy túrde aınalysýǵa múmkindikteri bar. Sonymen birge, qoldanystaǵy zańnamaǵa sáıkes, balyq sharýashylyǵyn júrgizý úshin sý aıdyndaryn konkýrstyq negizde bekitýge múmkindik bar ekenin atap ótken jón. Osyǵan baılanysty, qazirgi jáne keleshek urpaqtyń múddelerin eskere otyryp balyq resýrstaryn saqtaý maqsatynda, zańsyz balyq aýlaý úshin qarastyrylǵan qylmystyq jazany jeńildetý orynsyz dep sanaımyz», - dedi Álııa Shalabaeva.
