Zańsyz aınalymnan jalpy somasy 38 mıllıon teńgeni quraıtyn 110 myń dana kontrafaktili ónim alyndy

Bul týraly búgin elordada ótken «QR-daǵy zııatkerlik menshik quqyqty sottyń qorǵaýy: sońǵy tendentsııalary jáne keleshegi» atty halyqaralyq konferentsııa barysynda QR Ádilet mınıstrligi Zııatkerlik menshik quqyǵy komıtetiniń tóraıymy Lıza Stambekova málim etti.

Onyń atap ótýinshe, komıtet kontrafaktili ónimderdiń taralý faktilerin anyqtaý jáne aldyn alý boıynsha is-sharalardy turaqty ótkizýde. Máselen, aǵymdaǵy jyldyń 9 aıynda zııatkerlik menshik nysandaryn paıdalanatyn sýbektilerge 660 tekserý júrgizilgen. «Sonyń nátıjesinde 266 is qozǵalsa, onyń 249-y ákimshilik quqyqty buzýǵa, al 17-si taýar belgisin zańsyz paıdalanýǵa qatysty bolyp otyr. Zańsyz aınalymnan jalpy somasy 38 mıllıon teńgeni quraıtyn 110 myń dana kontrafaktili ónim alyndy», - dedi L.Stambekova.

Komıtet tóraıymynyń sózine qaraǵanda, kontrafaktili ónimderdi taratýǵa qatysty 68 qylmystyq is qozǵalǵan. Bul ótken jyldyń sáıkes kezeńimen salystyrǵanda 2 esege jýyq kóp. Sondaı-aq atalǵan ónimderdi shyǵaratyn 20 jasyryn tsehtyń jumysy da áshkere bolyp otyr.