Zańsyz aınalymnan 24 mln teńgeniń geroıni alyndy

NUR-SULTAN. QazAqparat – Zańsyz aınalymnan 24 mln teńgeniń geroıni alyndy. Bul týraly QR ІІM Esirtki qylmysyna qarsy is-qımyl departamentiniń basqarma bastyǵy Berikhan Nurǵalıev aıtty, dep habarlaıdy QazAqparat tilshisi.

«Aqmola oblysynda geroın jetkizý arnasy joıyldy. Tselınograd aýdanynyń turǵyny men esirtki satqany úshin buǵan deıin sottalǵan elorda turǵyny qylmys ústinde ustaldy. Kúdikti áıeldiń jeke zattaryn tintý barysynda satýǵa arnalǵan 595 gramm geroın tárkilendi. Al úıin tintý barysynda taǵy da 845 gramm geroın tabyldy. Tárkilengen esirtkiniń jalpy salmaǵy 1 keli 440 gramdy quraıdy. Zańsyz aınalymǵa shamamen 24 mln teńgeniń esirtkisi jiberilgen joq», - dedi ol ІІM baspasóz qyzmeti alańynda ótken brıfıng barysynda.

Onyń dereginshe, geroınniń iri partııasy ózge de óńirlerde tárkilengen.

«Atap aıtqanda, Jambyl oblysynda 600 gramm, Qostanaı oblysynda Tobyl qalasynyń turǵynynan 200 gramm esirtki tárkilendi. Esterińizge sala keteıik, bul esirtkiniń 1 gramynan bastap-aq asa iri kólemde dep sanalady», - dedi Berikhan Nurǵalıev.