Zańsyz aınalymdaǵy 70 myń dári men jarty mıllıon maska tárkilendi
NUR-SULTAN. QazAqparat – QR Іshki ister vıtse-mınıstri Alekseı Kalaıchıdı zańsyz aınalymdaǵy dárilik zattardy anyqtaý jumystary týraly aıtyp berdi, dep habarlaıdy QazAqparat.
«Memleket basshysynyń dárilik zattardy zańsyz saýdalaýǵa qatysty tapsyrmasy oryndalyp jatyr. 5 shildeden beri mundaı 537 zańbuzýshylyq anyqtaldy, onyń 58-i boıynsha QR Qylmystyq Kodeksiniń 214-baby boıynsha sotqa deıingi tergeý bastalǵan. Qalǵandary ákimshilik óndiriske jiberildi. Polıtsııaǵa 431 adam jetkizildi», - dedi spıker Ortalyq kommýnıkatsııalar qyzmetinde ótken onlaın brıfıngte.
Spıkerdiń aıtýynsha, zańsyz aınalymnan 70,8 myń qaptama medıtsınalyq preparattar, jarty mıllıonǵa jýyq medıtsınalyq maska, 36 myń dana qolǵap pen ózge de buıymdar (qyzý ólshegish, kózdi qorǵaý quraly) jáne 705 lıtr antıseptık alynǵan.
«Alynǵan ónimderdiń basym kópshiligi Shymkent (19,5 myń dana buıym), Almaty (14,5 myń dana), Nur-Sultan (5 myń dana), Atyraý (11,8 myń dana) jáne Jambyl (4,2 myń dana) oblystaryna tıesili. Quqyqbuzýshylyq týraly barlyq materıaldar ekonomıkalyq tergeýler qyzmetine jáne densaýlyq saqtaý organdaryna jiberildi», - dedi vıtse-mınıstr.
Zańsyz aınalymnan alynǵan medıtsınalyq preparattar men buıymdar densaýlyq saqtaý organdaryna naýqastardy emdeýge jiberiledi.
