Zańsyz ań aýlaýshylarǵa salynatyn aıyppul kólemi artty
QOSTANAI. QazAqparat - Bıyldan bastap zańsyz ań aýlaýshylarǵa salynatyn aıyppul kólemi artty, dep habarlaıdy QazAqparat.
Óńirde túz taǵylaryna tóngen qaýip tyıylar emes. Osyǵan oraı, brakonerlerge qarsy jaza qatańdatyldy. Bıyldan bastap zańsyz ań aýlaýshylarǵa salynatyn aıyppul kólemi artty. Al, sibiri eligin atsa, zań buzýshy 900 myń teńge tóleıdi.
«Ań aýlaýǵa qoıylatyn ózindik talaptar bar. Ańshy kýáligi, salyq zańnamasynda bekitilgen memlekettik baj salyǵynyń tólengeni týraly túbirtek, janýarlar dúnıesin paıdalanýǵa ruqsat, ańshylyq sharýashylyǵy sýbektisiniń joldamasy, ańshylyq atys qarýyn saqtaý jáne alyp júrý quqyǵyna bergen Іshki ister organdarynyń ruqsaty, jyrtqysh qustardy belgilengen tártippen berilgen tirkeý týraly qujat bolýy tıis. Ótken jyldyń ózinde tıisti qujattarsyz ań aýlaýǵa baılanysty 33 is tirkeldi. Brakonerler memleketke 350 mln teńge shyǵyn keltirgen. Zańsyz ań aýlaý boıynsha QR QK 337 jáne 339-baptarymen qylmystyq is qozǵalatynyn eskertemiz», - deıdi Qostanaı oblystyq orman sharýashylyǵy jáne janýarlar dúnıesi aýmaqtyq ınspektsııasynyń bas mamany Suńqarjan Baıdáýletov.
Qostanaı oblysynda 99 ańshylyq sharýashylyq tirkelgen. 2018 jyldyń qyrkúıeginde ashylǵan ańshylyq maýsymy aqpan aıyna deıin jalǵasady. Budan keıin ań, qus atý zańǵa qaıshy áreket sanalady.
Elimiz boıynsha arnaıy ruqsatpen aýlaýǵa sútqorektilerdiń 34, qustardyń 59 túri jatady. Tek zań boıynsha belgilengen ańshylyq nysanda aýlanýy tıis ańdardyń tizimine buǵy, aıý, taý eshki, elik jáne dońyz kiredi. Al qustardan shil, qur, qaz jáne úırektiń barlyq túrine ańshylyq etýge ruqsat berilgen.
