Zańsyz altyn izdeýshilerden Bestóbe shahtasynan dereý shyǵý talap etildi

KÓKShETAÝ. QazAqparat - Aqmola oblysynyń Bestóbe kenishindegi shahtada altyn kenin zańsyz izdeýmen aınalysyp júrgender áli de bar. «Altynalmas AK» AQ-nyń basshylyǵy shahtaǵa óz betimen túsken adamdardyń ómirine alańdap otyr, dep habarlaıdy QazAqparat tilshisi.

««Altynalmas AK» AQ Bestóbe kenishiniń isten shyqqan altyn óndirý shahtasynda zańsyz altyn óndirýshilerdiń ólimge ushyraǵanyna alańdap otyr. Osyǵan baılanysty atalmysh shahtadaǵy zańsyz kenshilerdi shahtadan shuǵyl túrde shyǵýǵa shaqyrady.

Kompanııa Bestóbe kenishindegi shahtada altyndy zańsyz izdeýmen aınalysyp júrgenderdiń densaýlyǵy men ómiri úshin jaýap bermeıdi.

Ótken aptada shahtada eki adamnyń máıiti, jaraqat alǵan 1 adam tabyldy. 22 shildede 655 metr tereńdikte jarylǵysh materıaldardy tasymaldaýǵa arnalǵan arbada 1 adamnyń denesi tabylsa, 25 shildede 1 adamnyń máıiti men kóptegen jaraqaty bar adam tabyldy. Olar shahtada jasalǵan ruqsat etilmegen jarylys kezinde qulaǵan taý jynystarynyń astynda qalǵan. Zańsyz altyn izdeýshiler máıitterdi ken ornynyń qyzmetkerleri joǵary kóterip alýy úshin shahtanyń oqpanyna ákelgen. 25 shildede jer betine shyǵarylǵan zańsyz altyn izdeýshilerdiń biriniń aıtýynsha, shahtada zańsyz kásippen aınalysatyn adamdar áli de bar.

Kompanııa qaıtys bolǵandardyń otbasylaryna kóńil aıtyp, altyndy zańsyz óndirý zańǵa qaıshy jáne ómirge asa qaýipti ekenin eske salady», - dedi vedomstvodan.

Osy rette, «Altynalmas AK» AQ-nyń baspasóz qyzmeti Qylmystyq kodekstiń 334-baby boıynsha jer qoınaýyn óz betinshe paıdalanǵany úshin jaýapkershilik qarastyrylǵanyn, zań buzǵan adamdar 5 jylǵa deıin bas bostandyǵynan aıyrylýy múmkin ekenin eske salady. Al Qylmystyq kodekstiń 269-1-babynda kúzetiletin aımaqqa zańsyz kirgenderge 10 jylǵa deıin bas bostandyǵynan aıyrý túrindegi jaza eskerilgen. Osy kodekstiń 295-1-babyna sáıkes baǵaly metaldar, asyl tastar, quramynda baǵaly metaldar bar shıkizat taýarlaryn zańsyz saýdalaǵandar 7 jylǵa deıin túrmege qamalýy múmkin.

Eske salaıyq, 22 shildede Bestóbe altyn kenishinde er adamnyń denesi tabyldy. 25 shildede taǵy bir adamnyń máıiti men zardap shekken bir adam anyqtaldy. Olardyń barlyǵy bir jylǵa jýyq ýaqyttan beri toqtap turǵan shahtada altyn kenin zańsyz izdeýmen aınalysqan.

Foto: b2b-im.com