Zańsyz aqsha aınalymyn júrgizgen qylmystyq top ustaldy
ALMATY OBLYSY. QazAqparat – Almaty qalasy men Almaty oblysy aýmaǵynda aqshany zańsyz qolma-qolǵa aınaldyrýmen aınalysqan uıymdasqan qylmystyq top áshkerelendi. Bul týraly QR QM Qarjy monıtorıngi komıtetiniń baspasóz qyzmetine silteme jasap habarlaıdy.
«Komıtettiń Almaty oblysy boıynsha Ekonomıkalyq tergeý departamenti qyzmetkerleri Almaty qalasy men Almaty oblysy aýmaǵynda quqyqqa qarsy is-áreketti júzege asyratyn qylmystyq topty anyqtady. Tergeý jumystary barysynda UQT músheleriniń 2019 jylǵy naýryz aıynan qazirgi ýaqytta deıin is júzinde jumystardy oryndamaı, qyzmetterdi kórsetpeı jáne taýarlardy tıep-júktemeı shot-faktýralardy resimdeý jolymen zańsyz aqsha qarajatyn 15-ten asa jalǵan kásiporyndar arqyly qolma-qolǵa aınaldyrǵany belgili boldy. Salyq tólemeý túrinde memleketke keltirilgen zalal kólemi shamamen 3 mlrd teńgeden astam somany quraıdy. Tintý júrgizý barysynda mór, noýtbýk, prınter, býhgalterlik qujattama jáne jańa jasalǵan sharttardyń jobalary alyndy», - delingen habarlamada.
Osy fakti boıynsha sotqa deıingi tergeý bastalyp, UQT uıymdastyrýshylaryn qamaýda ustaý túrindegi jolyn kesý sharasy qoldanyldy.
QR QK 216-babyna sáıkes is júzinde jumystardy oryndamaı shot-faktýralardy resimdeý áreketin jasaǵany úshin múlkin tárkilep merzimi 7 jylǵa deıin bas bostandyǵynan aıyrý jazasy qarastyrylǵan.
