Zańsyzdyqtyń aldyn alý: Májilis jańa zań jobasyn maquldady

ASTANA. KAZINFORM – Májiliste «Quqyqbuzýshylyq profılaktıkasy týraly» zań jobasy jáne oǵan ilespe eki zań jobasy birinshi oqylymda maquldandy. Jańa qujatty Іshki ister mınıstri Erjan Sádenov tanystyrdy.  

Mınıstrdiń aıtýynsha, zań jobasy Prezıdent tapsyrmasy boıynsha ázirlendi. Onda quqyqbuzýshylyqqa yqpal etetin sebepterdi joıýǵa nazar aýdarylady.

– Bir baǵytta bes zań biriktiriledi. Ol profılaktıka týraly, turmystyq zorlyq-zombylyq, kámeletke tolmaǵandar, azamattardyń tártipti saqtaýǵa qatysýy jáne ákimshilik qadaǵalaý týraly zańdar. Profılaktıka barlyq deńgeıde qamtamasyz etilýi kerek. Bul tásilder zań jobasynda kózdelgen. Birinshiden, ortaq jaýapkershilik engiziledi. Ákimder óńirdegi quqyqtyq tártiptiń jaı-kúıi úshin, memlekettik organdar quzireti boıynsha profılaktıka úshin, máslıhattar olardyń esebin tyńdaý boıynsha jáne aqsaqaldar, jurtshylyq keńesteri sekildi jergilikti qoǵamdastyqtardyń róli kúsheıtiledi, – dedi mınıstr Májilistiń jalpy otyrysynda.

Ekinshiden, profılaktıka jónindegi vedomstvoaralyq komıssııanyń mártebesi joǵarylaıdy. Endi komıssııanyń quramy men quzyretin Prezıdent bekitedi. Baǵa ulttyq baıandamada beriledi.

– Úshinshiden, profılaktıka jasalatyn sýbektiler tizbesi 13-ten 26-ǵa deıin keńeıtiledi. Olardyń ıdeologııalyq túsindirý jáne tárbıe jumysy, áleýmettik beıimdeý jáne ońaltý, tsıfrlyq sheshimderdi engizý boıynsha quzyretteri naqtylanady. Sondaı-aq azamattardyń, kásipkerlerdiń profılaktıkaǵa qatysý tásilderi bekitiledi. Endi barlyq quqyq qorǵaý organdary qoǵamdyq kómekshiler tarta alady, – deıdi E.Sádenov.

Sonymen birge, jeke profılaktıka sharalary kúsheıtiledi. Profılaktıkalyq baqylaýǵa jatatyn esepke alynǵan adamdardyń tizbesi 6-dan 16-ǵa deıin keńeıtiledi. Ákimshilik qadaǵalaýdy qoldaný salasy ulǵaıtylady.

– Jańa tetikter de engiziledi: resmı eskertý, ómirlik qıyn jaǵdaıdaǵy adamdardy esepke alyp, olardyń áleýmettik beıimdeý jáne ońaltý, joǵary nazardy talap etetin jasóspirimderdi pedagogıkalyq súıemeldeý, jaqyndaýǵa tyıym salý, ilespe zań jobalary sheńberinde ákimshilik jaýapkershilik, quqyqqa qarsy kontentti jarııalaý jáne tartý úshin engiziledi, – dedi vedomstvo basshysy.

Zańnama normalaryna Áleýmettik kodeks jáne úsh zań sáıkes keltiriledi.

Zań jobasy qoǵam qaıratkerleriniń, quqyq qorǵaýshylardyń, ǵalymdar men sarapshylardyń qatysýymen ázirlengen. Kópshilik tyńdaýlar ótti, saraptamalar júrgizildi, Prezıdent Ákimshiligimen kelisildi, Parlamenttiń qoǵamdyq palatasynyń otyrysynda qaraldy.

Negizgi zańǵa ilespe retinde «QR keıbir zańnamalyq aktilerine quqyqbuzýshylyq profılaktıkasy máseleleri boıynsha ózgerister engizý týraly» jáne «QR Ákimshilik quqyq buzýshylyq týraly kodeksine quqyqbuzýshylyq profılaktıkasy máseleleri boıynsha ózgeris pen tolyqtyrýlar engizý týraly» zań jobalary maquldandy.

Aıta keteıik, jańa zań jobasy qoldanystaǵy bes zańnyń normalaryn biriktiredi jáne biryńǵaı profılaktıka júıesin qurýǵa baǵyttalǵan. Sondaı-aq oǵan profılaktıkanyń arnaıy jáne qylmystyń saldaryn zertteý sharalary engiziledi. Bul týraly depýtat Magerram Magerramov Kazinform tilshisine arnaıy suhbat bergen edi.

Buǵan deıin Májilis radıoaktıvti qaldyqtarmen jumystyń tártibin naqtylaıtyn zań jobasyn nazarǵa aldy.