Zańsyz jumystan shyǵarylǵan 18 adam qyzmetine qaıta oraldy
ASTANA. KAZINFORM — 2026 jyldyń alǵashqy toǵyz aıynda Konstıtýtsııalyq Sottyń quqyqtyq ustanymdaryn iske asyrý nátıjesinde 917 azamattyń quqyǵy qalpyna keltirildi. Bul týraly Bas prokýratýra organdary habarlady.
Esepti kezeńde prokýrorlyq qadaǵalaý jáne den qoıýdyń 130 aktisi engizilip, azamattarǵa 1,8 mln teńgeden astam qarajat óteldi. Sondaı-aq jumysta úsh saǵattan astam ýaqyt bolmaǵany úshin buryn jumystan shyǵarylǵan 18 adam qyzmetine qaıta ornalastyryldy.
Shetelge kóshken azamattyń zeınetaqysy qalpyna keltirildi
Konstıtýtsııalyq Sottyń 2026 jylǵy 18 mamyrdaǵy normatıvtik qaýlysynda shetelde turýdyń ózi zańda belgilengen talaptar saqtalǵan jaǵdaıda jasyna baılanysty zeınetaqy men memlekettik bazalyq zeınetaqy tólemderin taǵaıyndaýdan bas tartýǵa nemese olardy toqtatýǵa negiz bola almaıtyny túsindirilgen.
Osy ustanymdy iske asyrý barysynda Jetisý oblysynyń prokýratýrasy azamattyń zeınetaqysy Qazaqstannan shetelge turaqty turýǵa kóshkeni úshin toqtatylǵanyn anyqtady. Prokýrorlyq den qoıý sharalarynan keıin onyń quqyqtary tolyq qalpyna keltirildi.
Budan bólek, 18 maýsymda Shyǵys Qazaqstan oblystyq sotynyń ákimshilik ister jónindegi sot alqasy osy normatıvtik qaýlyǵa negiz bolǵan azamattyń talap qoıýyn qanaǵattandyrdy.
Ata-analarǵa 249 myń teńgeden astam qarajat qaıtaryldy
Konstıtýtsııalyq Sottyń 2026 jylǵy 11 maýsymdaǵy normatıvtik qaýlysynda balamen qarym-qatynas jasaý tártibine qatysty sot sheshimderin oryndaý kezinde jeke sot oryndaýshylarynyń qyzmetine aqy tóleý máselesi qarastyrylǵan. Quqyqtyq ustanymǵa sáıkes, sot sheshimi óz paıdasyna shyǵarylǵan ata-anaǵa negizsiz qosymsha shyǵyndar júkteýge jol berilmeýi kerek.
Shymkent qalasynyń prokýratýrasy osyndaı shyǵyndardyń ata-analardan óndirilgen faktilerin anyqtady. Qabyldanǵan sharalar nátıjesinde úsh azamatqa 249 750 teńge óteldi.
Osyndaı zań buzýshylyqtar Astana qalasy men Soltústik Qazaqstan oblysynda da anyqtaldy. Prokýrordyń narazylyǵynan keıin zańsyz qaýlynyń kúshi joıylyp, jeke sot oryndaýshysy tártiptik jaýaptylyqqa tartyldy.
Túsindirý jumystary da júrgizildi
Prokýratýra organdary Konstıtýtsııalyq Sottyń quqyqtyq ustanymdaryn túsindirý maqsatynda óńirlerde 32 semınar, 131 kezdesý, 48 dóńgelek ústel ótkizip, 183 dáris oqydy. Sonymen qatar 46 aqparattyq hat joldanyp, áleýmettik jelilerde 522 túsindirý is-sharasy ótkizildi, buqaralyq aqparat quraldarynda 116 materıal jarııalandy.
Buǵan deıin Konstıtýtsııalyq Sot jer daýlaryna qatysty Joǵarǵy Sot qaýlysyn tekseretinin jazǵanbyz.
