Zańsyz jolaýshy tasymalynyń 139 deregi anyqtaldy
ASTANA. KAZINFORM — 11-16 shilde aralyǵynda elimizdiń aýmaǵynda jol-kólik oqıǵalarynyń aldyn alý jáne jol qozǵalysyna qatysýshylardyń tártibin arttyrý maqsatynda «Qaýipsiz jol» jedel-profılaktıkalyq is-sharasy ótkizilip jatyr.
— Qurmetti jol júrisine qatysýshylar! Jaz mezgilinde jol-kólik oqıǵalarynyń, onyń ishinde kámeletke tolmaǵandardyń qatysýymen bolatyn apattardyń aldyn alý maqsatynda 11-16 shilde aralyǵynda elimizde «Qaýipsiz jol» jedel-profılaktıkalyq is-sharasy ótýde. Joldaǵy baqylaý kúsheıtilip, avtopatrýlder sany artty.
Polıtsııa narıadtary jolda júrý qaǵıdalaryn buzýshylyqtyń aldyn alýǵa jáne jolyn kesýge baǵyttalǵan jumystardy júrgizýde. Іs-sharanyń alǵashqy úsh kúninde jol júrisi qaǵıdalaryn buzýdyń 22,5 myńnan astam deregi anyqtaldy.
Onyń ishinde: kólik quralyn mas kúıde basqarýdyń 300-den astam deregi; joldyń qarsy jolaǵyna shyǵýdyń 260 deregi; jolaýshylardy jáne júkterdi tasymaldaý qaǵıdalaryn buzýdyń 854 deregi; jolaýshylardy zańsyz tasymaldaýdyń 139 deregi, onyń ishinde 60-tan astamy taksı qyzmeti salasynda anyqtaldy.
Arnaıy turaqtarǵa 1,5 myńnan astam kólik quraly qoıyldy. Polıtsııa barlyq jol júrisine qatysýshylardy jolda júrý qaǵıdalaryn qatań saqtaýǵa, qaýipti manevrlerge jol bermeýge jáne joldaǵy qaýipsizdik ár adamnyń jaýapkershiligine baılanysty ekenin este ustaýǵa shaqyrady, — dedi ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova.
Aıta ketelik Kólik mınıstrligi eldegi jol apattarynyń 91%-y júrgizýshilerdiń kinásinen bolatynyn aıtqan edi.
