Zańsyz jer bólgen: Almaty oblysynda aýdan ákimdiginiń qyzmetkerlerine qylmystyq is qozǵaldy

QONAEV. KAZINFORM – Almaty oblysynyń prokýratýrasy Qarasaı aýdany ákiminiń apparatyna júrgizilip jatqan tekserý týraly agenttik saýalyna jaýap berdi.

Almaty oblysy prokýrorynyń orynbasary Abylaıhan Ońdasynnyń jaýabyna sáıkes, qazirgi ýaqytta jer zańnamasynyń saqtalý zańdylyǵyna qatysty Qarasaı aýdany ákiminiń apparatyna tekserý jumystary áli júrip jatyr.

Alaıda aldyn ala tekserý barysynda jerdi zańsyz berý, bólý, nysanaly maqsatyn ózgertý, jalǵan sheshimder arqyly jer alý boıynsha birqatar zańbuzýshylyqtar anyqtalǵan.

- Olar boıynsha prokýratýranyń úılestirýimen Qarasaı aýdanynyń polıtsııa basqarmasy QR QK-niń 385-babynyń 3-bóligi (kórineý jalǵan qujatty paıdalaný) boıynsha eki qylmystyq is qozǵalyp, qadaǵalaý aktileri engizildi. Tekserý jumystary jalǵasýda, - dedi oblys prokýrorynyń orynbasary.

Eske salaıyq, buǵan deıin oblys prokýratýrasynyń tapsyrmasy negizinde Qarasaı aýdany ákimi apparatynyń qyzmetine qatysty tekserý is-sharalary júrgizilip jatqanyn jazǵanbyz.