Zańsyz utys oıyndaryn uıymdastyrǵandar 40 mln teńgege jýyq aıyppul tóledi

ASTANA. KAZINFORM — Monıtorıng nátıjesinde jáne jeke tulǵalardan komıtetke kelip túsken ótinishter negizinde bıyl 89 adam Ákimshilik quqyq buzýshylyq týraly kodeksiniń (ÁQBtK) 445-1-babynyń 6-bóligi boıynsha ákimshilik jaýapkershilikke tartyldy. Bul týraly Týrızm jáne sport mınıstrliginiń baspasóz qyzmeti habarlady. 

Týrızm jáne sport mınıstrliginiń Oıyn bıznesin jáne lotereıany retteý komıteti áleýmettik jeliler men onlaın-platformalarda zańsyz lotereıa qyzmetin anyqtaý maqsatynda turaqty túrde monıtorıng júrgizip keledi.

Zańsyz utys oıyndaryn uıymdastyrǵan tulǵalarǵa eskertý hattary joldanyp, oflaın jáne onlaın formattarda túsindirý kezdesýleri ótkizildi. Áleýmettik jelilerde utys oıyndaryn ótkizgen akkaýnttardyń tizimi mınıstrliktiń resmı saıtynda jarııalanǵan.

Hattamamen kelisken jaǵdaıda quqyq buzýshylar aıyppuldy óz erkimen tóleıdi, al kelispegen jaǵdaıda is sotqa joldanyp, sot tártibimen qaralady.

Eske sala ketsek, QR ÁQBtK 445-1-babynyń 6 jáne 7-bólikterine sáıkes, lotereıa operatory emes tulǵa lotereıa ótkizetin bolsa, jeke tulǵalarǵa 100 aılyq eseptik kórsetkish (AEK), al shaǵyn kásipkerlik sýbektilerine (jeke kásipkerlerge) 300 AEK mólsherinde aıyppul qarastyrylǵan.

— Bir jyl ishinde osyndaı quqyq buzýshylyq qaıtalanǵan jaǵdaıda aıyppul mólsheri jeke tulǵalarǵa — 200 AEK, shaǵyn kásipkerlik sýbektilerine — 750 AEK bolyp belgilenedi. Sondaı-aq ákimshilik quqyq buzýshylyqtan túsken tabys tárkilenedi, — delingen mınıstrlik habarlamasynda. 

Aıta ketelik 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovaǵa qatysty qylmystyq is qozǵalǵan edi.