Zańsyz utys oıyndaryn uıymdastyrǵan 121 adam jaýapqa tartyldy
ASTANA. KAZINFORM – 2025 jyly zańsyz utys oıyndaryn uıymdastyrǵan 121 adam jaýapkershilikke tartyldy.
Týrızm jáne sport mınıstrliginiń Oıyn bıznesin jáne lotereıany retteý komıteti áleýmettik jeliler men onlaın-platformalarda zańsyz lotereıa qyzmetin anyqtaý maqsatynda turaqty monıtorıng júrgizip keledi. Monıtorıng nátıjesinde jáne jeke tulǵalardan komıtetke kelip túsken ótinishi negizinde 2025 jyly 121 adam QR Ákimshilik quqyq buzýshylyq týraly kodeksiniń (ÁQBtK) 445-1-babynyń 6-bóligi boıynsha ákimshilik jaýapkershilikke tartyldy.
Zańsyz utys oıyndaryn uıymdastyrǵan tulǵalarǵa eskertý hattary joldanyp, oflaın jáne onlaın formattarda túsindirý kezdesýleri ótkizildi. Áleýmettik jelilerde utys oıyndaryn ótkizgen akkaýnttardyń tizimi mınıstrliktiń resmı saıtynda jarııalanǵan.
Hattama sheshimimen kelisken jaǵdaıda quqyq buzýshylar aıyppuldy óz erkimen tóleıdi. Kelispegen jaǵdaıda is sotqa joldanyp, belgilengen tártippen qaralady.
Eske sala ketsek, QR ÁQBtK 445-1-babynyń 6 jáne 7-bólikterine sáıkes, lotereıa operatory emes tulǵa lotereıa ótkizetin bolsa, jeke tulǵalarǵa 100 aılyq eseptik kórsetkish (AEK), al shaǵyn kásipkerlik sýbektilerine (jeke kásipkerlerge) 300 AEK mólsherinde aıyppul qarastyrylǵan. Bir jyl ishinde osyndaı quqyq buzýshylyq qaıtalanǵan jaǵdaıda aıyppul mólsheri jeke tulǵalarǵa – 200 AEK, shaǵyn kásipkerlik sýbektilerine – 750 AEK bolyp belgilenedi.
Sondaı-aq ákimshilik quqyq buzýshylyqtan túsken tabys tárkilenedi.
Týrızm jáne sport mınıstrligi azamattardy áleýmettik jelilerde uıymdastyrylatyn kúmándi utys oıyndary men aktsııalarǵa qatyspaýǵa shaqyrdy.
Buǵan deıin 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovaǵa qatysty qylmystyq is qozǵalǵanyn jazǵan edik.
