Zańsyz tranzıt: Qyrǵyzstannan Qazaqstanǵa ara ónimderi ákelinbek boldy

ASTANA. KAZINFORM — Jambyl oblysy Qordaı aýdanynda ornalasqan «Qarasý» veterınarııalyq baqylaý beketinde veterınarııalyq-sanıtarııalyq ınspektorlar ara sharýashylyǵy ónimderin zańsyz tranzıttik tasymaldaý áreketiniń jolyn kesti, dep habarlaıdy AShM baspasóz qyzmeti.

Belgili bolǵanyndaı, Qyrǵyz Respýblıkasynyń azamaty óz elinen Reseıge Qazaqstan aýmaǵy arqyly tranzıtpen «DAF» markaly júk avtokóligimen bal ónimderin tasymaldaǵan. Tekserý barysynda ónimge onyń qaýipsizdigi men shyǵý tegin rastaıtyn mindetti veterınarııalyq qujattardyń bolmaǵany anyqtaldy.

— Azamatqa Qazaqstan Respýblıkasynyń «Ákimshilik quqyq buzýshylyq týraly» kodeksiniń 406-babynyń 2-tarmaǵyna sáıkes ákimshilik aıyppul salyndy. Tasymaldanǵan ara sharýashylyǵy ónimderi keri qaıtaryldy, — delingen habarlamada.

Veterınarııalyq baqylaý jáne qadaǵalaý komıteti veterınarııalyq qyzmettiń baqylaýyndaǵy júkterdi tasymaldaýǵa tek belgilengen veterınarııalyq ilespe qujattar bolǵan jaǵdaıda ǵana ruqsat etiletinin eskertedi. Atalǵan talaptardy saqtaý veterınarııalyq-sanıtarııalyq qaýipsizdikti qamtamasyz etýdiń, sondaı-aq Qazaqstan aýmaǵyna qaýipti ónimderdiń ákelinýi men tranzıtiniń aldyn alý úshin aıryqsha mańyzdy sanalady.

Budan buryn Jambyl oblysynda zańsyz ańshylyqtan kelgen zalal 92 mln teńgeden asqanyn jazǵan bolatynbyz.