Zańsyz spırt óndirgen zaýyt basshysy bılikke 20 myń dollar para usyndy
ShYMKENT. KAZINFORM — Qarjylyq monıtorıng agenttigi Shymkentte spırt zaýytynyń qyzmetin tekserý barysynda 81 tonnadan astam esepke alynbaǵan spırt óndirý boıynsha zańsyz kásipkerlik qyzmet faktisin anyqtady.
Esepke alynbaǵan spırt sýrrogat alkogol ónimin óndiretin adamdarǵa satylǵan.
Kóleńkeli ekonomıkaǵa qarsy kúres josparyn oryndaý aıasynda ótken sharalar nátıjesinde anyqtalǵandaı, mereke jáne demalys kúnderi (senbi jáne jeksenbi) esepke alynbaǵan spırtti zańsyz tıep-jóneltýdiń faktileri tirkeldi.
Bul etıl spırtin saqtaý jáne ótkizý erejesin buzýǵa ákep soqqan (QR QM 20 aqpan 2015 jylǵy «Etıl spırtin saqtaý jáne ótkizý erejesin bekitý týraly» buıryǵy).
Qylmystyq jaýapkershilikten jaltarý maqsatynda atalǵan spırt zaýytynyń basshysy QMA Shymkent qalasy boıynsha departamentiniń laýazymdy tulǵasyna alkogoldi zańsyz satý jáne qylmystyq jaýapkershilikten bosatýdaǵy jalpy qamqorlyǵy úshin 20 000 AQSh dollar bir rettik tólem men aı saıyn 1 000 000 teńge somasynda para usynǵan.
Sottyń sanktsııasymen kúdikti qamaýǵa alyndy.
Tergeý jalǵasyp jatyr.
QR QPK 201-babyna sáıkes ózge aqparat jarııalanbaıdy.
