Zańsyz polıgondardy joıa almaǵan 10-nan astam ákimniń orynbasary jazalandy

ASTANA. KAZINFORM – Zańsyz polıgondardy joıý jumystaryn úılestire almaǵan 10-nan astam qala men aýdan ákiminiń orynbasary ákimshilik jaýapkershilikke tartyldy. Bul týraly Ekologııa jáne tabıǵı resýrstar mınıstrligi Ekologııalyq retteý jáne baqylaý komıtetiniń tóraǵasy Erbolat Qojyqov aıtty.

- Ekologııa jáne tabıǵı resýrstar mınıstrligi zańsyz polıgondardyń paıda bolýynyń aldyn alý, anyqtaý jáne joıýdy baqylaý boıynsha júıeli jumys júrgizedi. Sońǵy jyldary anyqtalǵan zańsyz polıgondar sanyn azaıtýdyń oń úrdisin baıqap otyrmyz. Eger 2020 jyly joıý deńgeıi 66 paıyz ǵana bolatyn 8 884 polıgon anyqtalsa, 2024 jyly olardyń sany 4 886-ǵa deıin azaıyp, onyń 93 paıyzy joıyldy. Bıyl ǵaryshtyq monıtorıng derekteri boıynsha 2 707 polıgon tirkeldi. Bul ótken jyldarmen salystyrǵanda aıtarlyqtaı az. Biraq olardy joıýda problema bar. Búgingi kúni anyqtalǵandardyń 672 nysany nemese 24 paıyzy ǵana joıyldy, - dedi ol Ortalyq kommýnıkatsııalar qyzmetindegi brıfıngte.

Komıtet basshysynyń dereginshe, Abaı, Jetisý, Aqmola, Aqtóbe, Shyǵys Qazaqstan, Jambyl, Qaraǵandy, Soltústik Qazaqstan oblystarynda jáne Shymkent qalasynda zańsyz polıgondardy joıý kórsetkishi tómen. Almaty, Qyzylorda, Pavlodar jáne Qostanaı oblystarynda zańsyz qoqys alańdaryn joıý jumystary joǵary deńgeıde júrgiziledi.

- Qaldyqtardy basqarý salasyndaǵy ekologııalyq talaptardy buzǵany, zańsyz polıgondardy joıý boıynsha jetkiliksiz jumysy úshin 87 laýazymdy tulǵa, onyń ishinde 10-nan astam aýdan jáne qala ákimderiniń orynbasarlary jalpy somasy 12,4 mln teńgege ákimshilik jaýapkershilikke tartyldy, - dedi Erbolat Qojyqov.

Buǵan deıin Soltústik Qazaqstan oblysynda jergilikti atqarýshy organdar ruqsat etilmegen qoqys polıgondaryn joıý týraly jalǵan derekter bergenin jazǵan edik.