Zańsyz oıyn men lotereıany nasıhattaıtyn 4,5 myń ınternet-resýrs bloktaldy — Marjyqpaev
ASTANA. KAZINFORM — «Kıbernadzor» aqparattyq júıesi arqyly onlaın-kazıno, zańsyz býkmekerlik keńse sıpattyndaǵy nemese olardy jarnamalaýshy 4,5 myń ınternet-resýrs pen silteme bloktaldy.
Bul týraly búgin Astana qalasynda ótken Qazaqstan Respýblıkasy Týrızm jáne sport mınıstrliginiń dene shynyqtyrý jáne sport, oıyn bıznesi men lotereıa qyzmetin retteý salalaryndaǵy 2023 jylǵy qyzmeti men 2024 jylǵa qoıylǵan negizgi mindetteri týraly keńeıtilgen Alqa májilisinde Ermek Marjyqpaev málim etti.
Mınıstr sondaı-aq atalǵan Alqa otyrysynda oıyn bıznesi men lotereıa qyzmetin retteý máselesine toqtaldy.
«Oıyn bıznesi sýbektilerimen belsendi jumys júrgizilýde, zańsyz oıyn avtomattarynyń zaldary jabylyp jatyr. Máselen, «Kıbernadzor» aqparattyq júıesi arqyly onlaın-kazıno, zańsyz býkmekerlik keńse sıpattyndaǵy nemese olardy jarnamalaýshy 4,5 myń ınternet-resýrs pen silteme bloktaldy. Budan bólek Telegram jáne WhatsApp messendjerlerinde chat-bot iske qosylǵan. Ol arqyly azamattar oıyn bıznesi jáne lotereıa sýbektileriniń qyzmetindegi buzýshylyqtar týraly habarlaı alady. Búgingi tańda kelip túsken 150-den astam ótinish qaralýda», - dedi mınıstr.
Aıta keteıik, elordadaǵy Alqa májilisinde mınıstr buqaralyq jáne olımpıadalyq sport túrlerin jetildirýde aýqymdy jumystar kútip turǵanyn aıtqan bolatyn. Sondaı-aq mınıstr sportshylardy daıarlaýdyń zamanaýı ınfraqurylymyn qurýdyń mańyzdylyǵyn atap ótken edi.
