Zańsyz oıyn bıznesimen, lýdomanııamen kúresýdiń keshendi jospary ázirlenip jatyr — Erlan Qarın

Memlekettik keńesshi Erlan Qarın Qazaqstan Respýblıkasy Prezıdenti janyndaǵy Jastar saıasaty jónindegi keńestiń qyzmetin qorytyndylady, dep habarlaıdy Kazinform.

— Qazaqstan Respýblıkasynyń Prezıdenti janyndaǵy Jastar saıasaty jónindegi keńes úshin 2023 jyl tabysty boldy. Bul Keńes jastarǵa qatysty birqatar mańyzdy strategııalyq qujatty ázirleýge atsalysty.

Atap aıtsaq, Memlekettik jastar saıasatynyń 2023 - 2029 jyldarǵa arnalǵan tujyrymdamasy daıyndaldy. Bıyl osy qujatty júzege asyrý barysynda jas azamattardyń kásipkerlikpen aınalysýyna jol ashatyn mańyzdy bastama qolǵa alyndy: jalpy somasy 26 mıllıard teńgeni quraıtyn 5,6 myń bıznes jobalary úshin 2,5% mólsherlemesimen jeńildetilgen nesıe beriledi. Kelesi jyly jastarǵa arnalǵan jeńildetilgen turǵyn-úı baǵdarlamasyn qolǵa alý josparda bar.

Keńestiń tikeleı qatysýymen ázirlengen taǵy bir mańyzdy qujat – Nashaqorlyqqa jáne esirtki bıznesine qarsy kúrestiń 2023 - 2025 jyldarǵa arnalǵan keshendi jospar. Sıntetıkalyq esirtkige qarsy is-qımyldyń mańyzdylyǵy alǵash ret Keńes alańynda aıtylǵan edi. Endi Jospardyń oryndalýy osy qurylymnyń turaqty baqylaýynda bolady, - dep jazdy Erlan Qarın Telegram arnasyndaǵy paraqshasynda. 

Memlekettik keńesshi sondaı-aq Keńestiń músheleri «Qazaqstan jastary – 2023» atty ulttyq baıandamany ázirleýge eleýli úles qosqanyn atap ótti. 

— Aldaǵy 2024 jyly da Keńes jastarǵa qatysty ózekti máselelermen belsene aınalysyp, Memleket basshysynyń bastamalaryn júzege asyrýǵa atsalysýdy jalǵastyratyn bolady. Naqty aıtqanda, búginde Keńes lýdomanııanyń taralýyna jol bermeý isin myqtap qolǵa aldy. Osy oraıda, onyń músheleriniń usynysymen qumar oıyn bıznesine qarsy is-qımyl jáne lýdomanııaǵa qarsy kúres jóninde keshendi jospardy ázirleý jumysy bastaldy, - dep jazdy ol.