Tanymal bloger Qaısar Qamza Vetnamnan ekstradıtsııalandy
ASTANA. KAZINFORM — Qazaqstan Respýblıkasynyń Bas prokýratýrasy men Qarjylyq monıtorıng agenttiginiń qyzmetkerleri Qazaqstannyń Vetnam Sotsıalıstik Respýblıkasyndaǵy Elshiliginiń qoldaýymen qumar oıyndaryn jarnamalaǵan kúdikti Qaısar Qamzany ekstradıtsııalady. Bul týraly Bas prokýratýra málim etti.
Tergep-tekserý organynyń nusqasy boıynsha 2025 jylǵy qańtarda ol áleýmettik jeliler men messendjerlerdegi aýqymdy aýdıtorııany paıdalana otyryp, syıaqy úshin zańsyz ınternet-kazıno jarnamasyn ornalastyrǵan jáne Qazaqstan azamattaryn qumar oıyndaryna qatysýǵa tartqan.
Internet-kazınony nasıhattaǵany úshin onyń krıptovalıýtalyq ámııanyna 200 myń AQSh dollary túsken.
— Qylmystyq toptyń qatysýshylary 2021 jyldan bastap 2025 jyldy qosa eseptegen merzimde Qazaqstanda birneshe zańsyz onlaın-kazınonyń qyzmetin uıymdastyryp, tólem termınaldary arqyly 106 mlrd teńgeden astam qarajatty zańsyz ıemdengen, — delingen habarlamada.
Osy oraıda, qylmystyq toptyń 9 sybaılas qatysýshysy qamaýǵa alynǵanyn, al qalǵandaryn, onyń ishinde joǵaryda atalǵan kúdiktige de halyqaralyq izdestirý jarııalanǵanyn atap ótken jón.
— Bıyl maýsym aıynda Іshki ister mınıstrliginiń Interpol Ulttyq ortalyq bıýrosynyń saýaly boıynsha ol Vetnam aýmaǵynda ustalyp, Bas prokýratýranyń suraý salýy negizinde Qazaqstanǵa ekstradıtsııalandy, — dep habarlady Bas prokýratýradan.
Qazirgi ýaqytta kúdikti tergeý ızolıatorynda kúzetpen qamaýǵa alyndy.
Kúdiktige taǵylyp otyrǵan aıyp boıynsha oǵan sol áreketti jasaǵany úshin múlki tárkilenip, jeti jylǵa deıingi merzimge bas bostandyǵynan aıyrý jazasyn taǵaıyndaý kózdelgen.
Eske sala keteıik, ІІM zańsyz oıyn bıznesin uıymdastyrǵany úshin halyqaralyq izdeýde júrgen bloger Qaısar Qamza sáýir aıynda ustalǵan bolatyn.
Al maýsymda QR Syrtqy ister mınıstrligi zańsyz oıyn bıznesin uıymdastyrǵany úshin halyqaralyq izdeý jarııalanǵan bloger Qaısar Qamzanyń Vetnamda qamaýda otyrǵanyn málimdedi.
