Zańsyz munaı aınalymy men janarmaı kontrabandasyna tosqaýyl qoıyldy
ASTANA. KAZINFORM — Jyl basynan beri Qarjylyq monıtorıng agenttigi ІІM jáne Shekara qyzmetimen birlesip janar-jaǵarmaı materıaldaryn el aýmaǵynan zańsyz shyǵarýdyń 712 áreketiniń jolyn kesti. Munaı ónimderiniń zańsyz aınalymy men kontrabandasy faktileri boıynsha 8 sotqa deıingi tergep-tekserý bastaldy. Bul týraly QMA málim etti.
Máselen, Mańǵystaý oblysynda 2022 jyldan beri esepke alynbaǵan 28,5 myń tonnadan astam munaıdy óńdegen zańsyz shaǵyn munaı óńdeý zaýytynyń qyzmeti áshkerelendi. Óndirilgen ónim mazýt retinde rásimdelip, shetelge shyǵarylǵan.
— Túrkistan oblysynda memlekettik shekara astynan arnaıy qazylǵan tonnel arqyly Ózbekstan Respýblıkasyna benzın kontrabandasyn uıymdastyrǵan transulttyq qylmystyq toptyń zańsyz qyzmeti toqtatyldy. Atalǵan is boıynsha kináli tulǵalar uzaq merzimge bas bostandyǵynan aıyryldy, — delingen habarlamada.
Sonymen qatar, Qyrǵyz Respýblıkasyna AI-92 markaly benzındi zańsyz tasymaldaýmen aınalysqan qylmystyq topqa qatysty tergeý aıaqtaldy. Zańsyz shyǵarylǵan janarmaı kólemi 190 myń tonnadan asyp, onyń quny 37 mlrd teńgeden joǵary bolǵan.
— Kezekti zańsyz tasymaldaý áreketi kezinde «Túrksib» stantsııasynda shamamen 500 tonna benzın tıelgen 8 temirjol tsısternasy ustaldy. Quny 138 mln teńge bolatyn tárkilengen benzın memleket kirisine aınaldyryldy, — dep habarlady agenttikten.
Eldiń ekonomıkalyq qaýipsizdigin qamtamasyz etý jáne janar-jaǵarmaı tapshylyǵyna jol bermeý maqsatynda Agenttik munaı ónimderin zańsyz tasymaldaý shemalaryn anyqtaý jáne jolyn kesý jumystaryn júıeli túrde jalǵastyryp jatyr.
Al UQK bıyl shekaradan 300 tonnadan astam janarmaı zańsyz ótkizilmek bolǵanyn málimdegen bolatyn.
