Zańsyz mıkroqarjy uıymyn qurǵandardyń 32 mlrd teńge kóleminde múlki tárkilendi

ALMATY. KAZINFORM – Almaty qalasy boıynsha Qarjylyq monıtorıng agenttiginiń departamenti qalalyq prokýratýranyń úılestirýimen «Creditum» MQU, «Sofi Finance» MQU, «Hava Finance» MQU, «SF Offline» MQU, «POS Credit» MQU, «Sálem Kredıt» MQU basshylaryna qatysty alaıaqtyq jáne zańsyz kásipkerlik qyzmet faktileri boıynsha tergeýdi jalǵastyryp jatyr.

Qarjylyq monıtorıng agenttiginiń málimetinshe, atalǵan MQU-dardyń zańsyz áreketteriniń saldarynan 327 myńnan astam azamat zardap shekken, olarǵa keltirilgen shyǵyn kólemi 30 mlrd teńgeni quraǵan.

— Tólemderi keshiktirilgen qaryz alýshylar Hava.kz, Koke.kz, Tengo.kz kompanııalarmen kepildik sharttaryn jasasýǵa májbúr bolǵan. Bul rette, kepilgerdiń jaýapkershiligi tek qaryz alýshy qaıtys bolǵan jaǵdaıda ǵana qarastyrylǵan. Bul qyzmet úshin bastapqy nesıe somasynan birneshe ese asyp túsetin tólem alynyp, azamattardy qaryzǵa batyrǵan. Nátıjesinde, qaryz alýshylar nesıe somasynan 3-5 ese artyq aqsha tóleýge májbúr bolǵan, — delingen habarlamada.

Mıkroqarjy uıymdarynyń esepshottaryna 1,8 mlrd teńge kóleminde tyıym salyndy, sondaı-aq 30 mlrd teńge mólsherinde nesıe portfeline shekteý qoıyldy.

MQU uıymdastyrýshysy 2 aıǵa qamaýǵa alyndy.

Onyń jalpy quny 225 mln teńge kóleminde 2 turǵyn úıi men BMW X6, Toyota Tundra markaly avtokólikterine tyıym salyndy.

Tergeý jalǵasady.

Eske sala keteıik, buǵan deıin alaıaqtyq qylmysy boıynsha tergelip jatqan kúdikti Perızat Qaırattyń isi boıynsha materıaldar 100 tomnan asqanyn jazǵan bolatynbyz.