Zańsyz mıgranttarmen kúres: 1240 sheteldik azamat elden shyǵaryldy
11-14 naýryz aralyǵynda elimizde "Mıgrant" respýblıkalyq jedel-profılaktıkalyq is-sharasy ótkizildi. Onyń barysynda kóshi-qon zańnamasyn buzýdyń 10 myńǵa jýyq faktisi anyqtaldy, - dep habarlaıdy Polisia.kz.
- 4,5 myń sheteldik azamat elde bolý merzimin buzǵan. 2,5 myńy zańsyz eńbek qyzmetimen aınalysqan. Onyń ishinde 60 zańsyz taksı júrgizýshisi bar. Atap ketsek, buǵan deıin júrgizilgen arnaıy operatsııa kezinde 700-ge jýyq zańsyz taksı júrgizýshisi anyqtalǵan bolatyn. 1240 sheteldik sot sheshimimen elden shyǵarylyp, olarǵa bes jylǵa Qazaqstanǵa kirýge tyıym salyndy. Zań buzýshylardyń basym bóligi jaqyn shet memleketten kelgender. Biraq odan bólek Bangladesh, Egıpet, Italııa, Nıgerııa jáne Madagaskar azamattary da anyqtaldy. Іzdeýde júrgen 20 sheteldik ustaldy, - dedi ІІM kóshi-qon qyzmeti komıtetiniń tóraǵasy Aslan Atalyqov.
2200 qabyldaýshy tulǵa sheteldikterdiń kelýi týraly polıtsııaǵa habarlamaǵany úshin ákimshilik jaýapkershilikke tartyldy. Olarǵa 12 mln teńge aıyppul salyndy.
500 qazaqstandyq jumys berýshige sheteldikterdi zańsyz jumysqa tartqany úshin 33 mln teńge aıyppul salyndy. Olardyń ishinde bes tulǵa osyndaı áreketti buryn da jasaǵan. Qazir bul azamattar qylmystyq jaýapkershilikke tartylyp jatyr.
Sheteldikterge jalǵan qujattar rásimdegen Qazaqstan azamattaryna qatysty 12 qylmystyq is qozǵaldy.
- Mysaly, Astana qalasynda bir ýnıversıtet jataqhanasynda komendant 56 eńbek mıgrantyna stýdent retinde ýaqytsha turýǵa ruqsat bergen. Almaty oblysynda notarıýstyń kómekshisi sheteldikterdi "joq" mekenjaılarǵa tirkeý úshin jalǵan senimhattar rásimdegen. Barlyq faktiler boıynsha sotqa deıingi tergeý júrgizilýde, - dedi Aslan Atalyqov.
ІІM mıgratsııalyq zańnamany saqtaýǵa jáne sheteldik qonaqtar men Qazaqstan azamattaryn kóshi-qon máseleleri boıynsha zańsyz qyzmet kórsetetin kúmándi tulǵalarǵa júginbeýge shaqyrady.
- Sheteldikterdiń kelýi týraly habarlama berý, jeke sáıkestendirý nómirin alý, daktoregıstratsııany ótý jáne ýaqytsha turýǵa ruqsat rásimdeý úshin memleket tólem almaıdy. Zań men tártipti saqtaýǵa shaqyramyz, - dep atap ótti ІІM kóshi-qon qyzmeti komıtetiniń tóraǵasy Aslan Atalyqov.
Buǵan deıin Qazaqstanǵa eńbek mıgranttary qaı elderden kóp keletinin jazǵanbyz.