Zańsyz kiristerge jol joq: Májilis jańa normalardy bekitti

ASTANA. KAZINFORM — Májilis depýtattary qylmystyq jolmen alynǵan kiristerdi zańdastyrýǵa, terrorızmdi qarjylandyrýǵa jáne jappaı qyryp-joıý qarýyn taratýdy qarjylandyrýǵa qarsy is-qımyl máseleleri boıynsha zań jobasyn ekinshi oqylymda qabyldady.

Zań jobasy kiristerdiń izin jasyrýǵa jáne terrorızmdi qarjylandyrýǵa qarsy is-qımyl ulttyq júıesin jetildirý úshin, sondaı-aq aqshany jylystatýǵa qarsy kúrestiń qarjylyq sharalaryn ázirleý tobynyń halyqaralyq standarttaryn iske asyrý maqsatynda ázirlendi.

Zań jobasynda mynalar kózdelip otyr:

— ýákiletti organdy bekitý arqyly qarjylyq monıtorıngtiń jańa sýbektilerin engizý (qarjylyq quraldarmen mámileler boıynsha klırıng qyzmetin kórsetetin uıymdar, óz qyzmetin taýar bırjasynda júzege asyratyn jáne bırjalyq taýarlarmen mámile jasaıtyn bırjalyq brokerler, uıaly baılanys operatorlary, «Azamattarǵa arnalǵan úkimet» korporatsııasy);

— qarjylyq monıtorıng sýbektileri úshin kúdikti qyzmet týraly habarlardy ýákiletti organǵa jiberý jóninde mindetter engizý.

Budan basqa, kiristerdiń izin jasyrý jáne terrorızmdi qarjylandyrý syn-qaterin baǵalaý júıesin 2 deńgeıge bólý usynylady — qarjylyq monıtorıng jónindegi ýákiletti organ júrgizetin ulttyq baǵalaý jáne ýákiletti organmen kelisilgen ádistermen óz quzyreti sheginde qarjylyq monıtorıng sýbektileriniń zańnamany saqtaýyn baqylaıtyn memlekettik organdar júrgizetin sektorlyq baǵalaý.

Zań jobasyn talqylaý kezinde depýtattar ekinshi oqylymǵa birqatar norma qabyldady:

— mádenı qundylyqtardy qolma-qol aqshalaı satyp alý (satý), mádenı qundylyqtardy Qazaqstan Respýblıkasyna ákelý nemese Qazaqstan Respýblıkasynan áketý operatsııalary boıynsha shekti 45 mln teńgeden 1 mln teńgege deıin tómendetýge;

— somasy 5 mln teńgege teń nemese odan asatyn, qarjylyq monıtorıngke jatatyn tsıfrlyq aktıvtermen jasalatyn operatsııalar úshin shekti belgileýge;

— qarjylyq monıtorıng jónindegi ýákiletti organnyń kommertsııalyq emes uıymdardyń kiristerdi zańdastyrý (jylystatý), terrorızmdi qarjylandyrý jáne jappaı qyryp-joıý qarýyn taratýdy qarjylandyrý qaýpin anyqtaý turǵysynan kúdikti operatsııalaryna taldaý jáne monıtorıng júrgizýine;

— qarjy mekemesiniń basshysy laýazymyna úmitker kandıdattyń is-áreketteri buryn qylmystyq kiristerdi jylystatýǵa, terrorızmdi qarjylandyrýǵa jáne jappaı qyryp-joıý qarýyn taratýdy qarjylandyrýǵa yqpal etken adamdarmen baılanysynyń bolýyn mindetti tekserýdi engizýge;

— menshik ıesi — zańdy tulǵada qylmystyq jolmen alynǵan kiristerdi jylystatý, terrorızmdi qarjylandyrý jáne jappaı qyryp-joıý qarýyn taratýdy qarjylandyrý salasyndaǵy qylmystary úshin alynbaǵan nemese ótelmegen sottylyǵynyń bolmaýy boıynsha talap engizýge;

— «jappaı qyryp-joıý qarýyn qarjylandyrý» uǵymyn engizýge;

— Áleýmettik medıtsınalyq saqtandyrý qoryn qarjylyq monıtorıngke jatatyn sýbektiler tizbesine engizýge;

— kóleńkeli bankter qurýǵa tyıym salýdy engizýge;

— qarjylyq monıtorıng sýbektilerine tıisinshe tekserý rásimderin júrgizý kezinde skorıngtik júıeni engizýge;

— qarjylyq monıtorıng sýbektilerine qashyqtan monıtorıngteýdi engizýge;

— memlekettik organdar úshin qylmystyq jolmen alynǵan kiristerdi zańdastyrý (jylystatý), terrorızmdi qarjylandyrý jáne jappaı qyryp-joıý qarýyn taratýdy qarjylandyrý qaýpine úsh jylda bir ret sektorlyq baǵalaý júrgizý mindetterin engizýge qatysty normalar.

Aıta keteıik, búgin Májiliste «Qazaqstan Respýblıkasy men Halyqaralyq Qaıta Qurý jáne Damý Banki arasyndaǵy qaryz týraly kelisimdi ratıfıkatsııalaý týraly» Zań jobasy qyzý talqylandy. 

Qazaqstan myńnan astam shalǵaı aýyldaryna talshyqty-optıkalyq baılanys jelileri men keńjolaqty ınternet tartý úshin Halyqaralyq Qaıta qurý jáne damý bankinen 84 mlrd teńge qaryz alatyn boldy.