Zańsyz kóshi-qonmen kúres Eýropalyq saıası qoǵamdastyqtyń sammıtinde basty taqyrypqa aınaldy

ASTANA. KAZINFORM - Anglııanyń Oksfordshır okrýgindegi Blenheım saraıynda ótken eýropalyq saıası qoǵamdastyq sammıtiniń negizgi talqylaý taqyryby zańsyz ımmıgratsııaǵa qarsy kúres boldy.

«Biz bandylardy (adam kontrabandashylary - red.) jeńemiz, olardyń bıznes úlgisin ózgertemiz jáne shekaramyzdy bekitemiz», - dedi Ulybrıtanııa premer-mınıstri Kır Starmer baspasóz máslıhatynda.

Ol Ulybrıtanııanyń Eýropalyq Odaqtyń Europol polıtsııa qyzmetimen yntymaqtastyǵyn nyǵaıtyp, Slovakııa, Slovenııa sııaqty eldermen kóshi-qon salasynda jańa yntymaqtastyq kelisimderin jasaıtynyn atap ótti.

«Biz eýropalyq seriktesterimizben bandylardy bıznesten shyǵarý úshin barlaý jumystaryn júrgizetin bolamyz», - dep qosty Starmer.

Zańsyz kóshi-qonnyń túpki sebebin joıý úshin Ulybrıtanııa premer-mınıstri Afrıka men Taıaý Shyǵystaǵy gýmanıtarlyq jáne bilim berý jobalaryn júzege asyrýǵa 84 mıllıon fýnt sterlıng bóletinin habarlady.

«Bul gýmanıtarlyq jáne medıtsınalyq qoldaýdy, biliktilikti arttyrýdy, jumysqa ornalasýǵa járdemdesýdi jáne bilimge qoljetimdilikti qamtıdy. «Bul kóshi-qon daǵdarysyn eńserýdiń mańyzdy bóligi», - dedi Ulybrıtanııa úkimetiniń basshysy.

Eýropalyq saıası qoǵamdastyqtyń sammıti – 2022 jyly Frantsııa prezıdenti Emmanýel Makronnyń bastamasymen Eýropanyń bolashaǵyn talqylaý úshin qurylǵan halyqaralyq forým. Osy tórtinshi sammıtke 35-ten astam memleket jáne úkimet basshylary qatysty.

Kelesi sammıt qarasha aıynda Vengrııada, al 2025 jyly Albanııa men Danııada ótedi.