Zańsyz kómek alýshylarmen kúres: zańnamaǵa áleýmettik aýdıt jasaýǵa múmkindik beretin ózgeris enedi
ASTANA. KAZINFORM — Premer-mınıstr Oljas Bektenov Úkimet áleýmettik ádilettilikti saqtap, masyldyq pıǵyldy azaıtý úshin sharalar qabyldaıtyn aıtty.
— Eńbek mınıstrligi múddeli memlekettik organdarmen jáne ákimdiktermen birlesip, osy jyldyń 1 jeltoqsanyna deıin áleýmettik qoldaý sharalarynyń barlyq óńirge arnalǵan biryńǵaı standartyn ázirleýi qajet. Barlyq kúmándi jáne tıimsiz áleýmettik tólemder men járdemaqylardy alyp tastaý kerek. Biz áleýmettik ádilettilikti saqtap, masyldyq pıǵyldy azaıtý úshin sharalar qabyldaıtyn bolamyz. Úkimettiń mindeti — barlyǵyna birdeı jaǵdaı jasaý, al azamattar jumys istep, ózin jáne óz otbasyn asyraýǵa umtylýy kerek. Memleket basshysy dál osy máselege aıryqsha kóńil bólip otyr, — dedi ol Úkimet otyrysynda.
Sondaı-aq Bektenov Eńbek mınıstrligine 1 qarashaǵa deıin Áleýmettik salanyń biryńǵaı tsıfrlyq platformasyn engizý tapsyrdy.
— Tsıfrlandyrýdy jáne jasandy ıntellekt tehnologııalaryn tereń engizý arqyly ekonomıkanyń barlyq salalaryndaǵy memlekettik qyzmetterdi baqylaý men monıtorıng júrgizýdiń túbegeıli jańa ádisteri jasalýǵa tıis. Tsıfrlandyrý mınıstrligimen birlesip, osy jyldyń 1 qarashasyna deıin Eńbek mınıstrligi janyndaǵy Áleýmettik salanyń biryńǵaı tsıfrlyq platformasyn engizý qajet. Sondaı-aq memlekettik organdar Áleýmettik kodekske áleýmettik aýdıt tetikterin engizýdi kózdeıtin ózgerister men tolyqtyrýlar engizý jónindegi zań jobasynyń jedel kelisilýin qamtamasyz etsin, — dedi Úkimet basshysy.
Eske salsaq keshe Prezıdent Úkimet keminde 15 jyl boıy áleýmettik masyldyq pen alaıaqtyqqa jol berip kelgeni týraly aıtqan.
Aıta keteıik, buǵan deıin Premer-mınıstr eldiń ekonomıka blogyna 10 naqty tapsyrma júktegen edi.