Zańsyz qoqys úıindisine jol bergen 61 ákimniń orynbasary jazaǵa tartyldy — mınıstr

ASTANA. KAZINFORM — Ekologııa jáne tabıǵı resýrstar mınıstri Erlan Nysanbaev Úkimet otyrysynda stıhııaly qoqys úıindilerimen qalaı kúresip jatqanyn málim etti.

— Spýtnıktik tehnologııalar qorshaǵan ortany qorǵaý salasyndaǵy zańnamany buzýshylyqtardy anyqtaý men joıýdyń tıimdi quraly bolyp otyr. Stıhııalyq qoqys úıindileriniń anyqtalǵany týraly «Qazaqstan Ǵarysh Sapary» derekteri negizinde aýmaqtyq ekologııa departamentteri árbir jaǵdaıdy tirkep, ákimdikterge zańsyzdyqtardy joıý týraly nusqama beredi. Ákimdikter tıisti sharalardy qabyldamaǵan jaǵdaıda laýazymdy tulǵalar ákimshilik jaýapkershilikke tartylady. Sonymen, 2024 jyly 164 laýazymdy tulǵa jalpy kólemi 9,4 mln teńgege, onyń ishinde aýdan jáne qala ákimderiniń orynbasarlary deńgeıinde 61 laýazymdy tulǵa ákimshilik jaýapkershilikke tartyldy, — dedi Erlan Nysanbaev.

Mınıstr keıingi jyldary qoqys úıindileriniń sany edáýir azaıǵanyn aıtty. 

— Máselen, 2018 jyly 8,7 myń qoqys úıindisi anyqtalyp, onyń 57%-y joıylsa, 2024 jyly shamamen 4,8 myń qoqys úıindisi anyqtalyp, onyń 91%-y joıyldy. Osyǵan baılanysty mınıstrlik eldi mekenderdiń qamtylý aımaǵyn keńeıtý jáne ǵaryshtyq túsirilimder jıiligin arttyrý arqyly bul jumysty kúsheıtýdi usynady, — dedi ol.

Buǵan deıin «Taza Qazaqstan» aktsııasynda mıllıon tonnaǵa jýyq qoqys shyǵarylǵany aıtylǵan edi.