Zańsyz qoqys úıindilerimen kúres: Almatyda TazaQala platformasy iske qosyldy
ALMATY. KAZINFORM — Almatyda turǵyndarǵa zańsyz qoqys úıindileri týraly habarlap, olardyń joıylýyn baqylaýǵa múmkindik beretin TazaQala tsıfrlyq platformasy tanystyryldy.
Platforma Almaty qalasy Mamandandyrylǵan tabıǵat qorǵaý prokýratýrasynyń bastamasymen Ál-Farabı atyndaǵy QazUÝ jáne «Eco Almaty» JShS-niń qoldaýymen ázirlengen. Joba respýblıkalyq «Taza Qazaqstan» ekologııalyq aktsııasy aıasynda júzege asyryldy.
— Jasandy ıntellekt elementterin paıdalanatyn TazaQala qala turǵyndaryna ekologııalyq máselelerdi sheshýge tikeleı qatysýǵa múmkindik beredi. Platforma arqyly turǵyndar zańsyz qoqys tógilgen oryndar týraly habarlap, ótinishteriniń mártebesi men aýmaqtardy tazartý jumystarynyń barysyn qadaǵalaı alady, — dep habarlady ákimdikten.
Almatynyń mamandandyrylǵan tabıǵat qorǵaý prokýrory Arman Núgirbekovtiń aıtýynsha, jańa júıe turǵyndar men memlekettik organdar arasyndaǵy turaqty baılanysty qamtamasyz etedi.
Prokýratýranyń málimetinshe, platforma iske qosylǵaly beri 871 zańsyz qoqys úıindisi anyqtalǵan. Onyń 507-si tolyqtaı joıylyp, aýmaqtardan 500 tonnadan astam qaldyq shyǵarylǵan. Buǵan qosa qaldyqtarmen jumys isteý kezindegi ekologııalyq talaptardy buzǵany úshin jergilikti atqarýshy organdardyń birqatar basshysy ákimshilik jaýapkershilikke tartyldy.
Eske salaıyq, Aqtóbede 32 zańsyz qoqys alańy anyqtaldy.
