Zańsyz qarjylyq operatsııalarǵa qarsy jańa sharalar bekitildi
ASTANA. KAZINFORM — Qazaqstan Respýblıkasy Prezıdentiniń kómekshisi E.N. Jıenbaevtyń tóraǵalyǵymen qylmystyq jolmen alynǵan kiristerdi jylystatýǵa, terrorızmdi qarjylandyrýǵa jáne jappaı qyryp-joıý qarýyn taratýdy qarjylandyrýǵa qarsy is-qımyl máseleleri jónindegi vedomstvoaralyq jumys tobynyń otyrysy ótti. Bul týraly Qarjylyq monıtorıng agenttigi málim etti.
Otyrys barysynda ulttyq jylystatýǵa qarsy júıesiniń barlyq býyndaryn nyǵaıtýǵa baǵyttalǵan sharalar qaraldy.
Jıynda FATF halyqaralyq standarttaryn engizýge, sondaı-aq ýákiletti organdardyń tıimdiligin aıqyndaıtyn 11 Tikeleı nátıje boıynsha ózara úılesimdi jumysty qamtamasyz etýge baǵyttalǵan Іs-sharalar jospary bekitildi.
— Atap aıtqanda, qarjylyq operatsııalardyń ashyqtyǵyn arttyrýǵa arnalǵan qosymsha sharalar kesheni kelisildi. Sonymen qatar, zańsyz maqsattarda paıdalanylýy múmkin jalǵan kompanııalardyń qyzmetine jáne baqylaýsyz qarajat jınaý faktilerine qarsy is-qımyl tásilderi maquldandy. Otyrys qorytyndysy boıynsha kiristerdi jylystatýǵa qatysty isterdi tergeý jáne sotta qaraý tájirıbesin jetildirý, sondaı-aq keńeıtilgen tárkileý men aktıvterdi qaıtarý tetikterin qoldaný boıynsha basym mindetter aıqyndaldy, — delingen habarlamada.
Іs-sharalar josparynyń iske asyrylý barysy Qazaqstan Respýblıkasy Prezıdenti Ákimshiliginiń baqylaýynda.
Eske salsaq, aǵymdaǵy jyldyń qańtar aıynda Memleket basshysynyń sheshimimen kiristerdi zańdastyrýǵa (jylystatýǵa), terrorızmdi qarjylandyrýǵa jáne jappaı qyryp-joıý qarýyn taratýǵa qarsy is-qımyl máseleleri boıynsha vedomstvoaralyq jumys toby qurylǵan bolatyn.
Atalǵan toptyń negizgi maqsaty — zańsyz qarjylyq operatsııalarǵa qarsy is-qımylda memlekettik organdarmen quqyq qorǵaý qurylymdarynyń kúsh-jigerin úılestirý jáne negizgi táýekelderdi azaıtý bolyp tabylady.
Aıta ket eıik, jaqynda qarjylyq monıtorıng agenttiginiń úzdik tergeýshileri anyqtaldy.
