Zańsyz ıemdenilgen 610 mlrd teńge memleketke qaıtaryldy - komıssııa

ASTANA. KAZINFORM – Premer-mınıstr Oljas Bektenov Zańsyz ıemdenilgen aktıvterdi memleketke qaıtarý jónindegi komıssııanyń kezekti otyrysyn ótkizdi, dep habarlaıdy Úkimettiń baspasóz qyzmeti.

Buǵan deıin qabyldanǵan sheshimderdiń oryndalý nátıjeleri qaralyp, Qaıtarylǵan aktıvterdi basqarý kompanııasynyń jumysy týraly esep tyńdaldy.

Shamamen 610 mlrd teńgeniń aktıvteri, atap aıtqanda, 506 mlrd teńge kóleminde aqshalaı qarajat, sondaı-aq quny 103 mlrd teńgeden astam múlik qaıtaryldy. Arnaýly memlekettik qordan bilim berý, densaýlyq saqtaý, sport, áleýmettik qamsyzdandyrý salalaryndaǵy 280 áleýmettik nysandy júzege asyrýǵa, sondaı-aq kommýnaldyq ınfraqurylymdy jańǵyrtýǵa qarajat bólindi.

Kezekti otyrys qorytyndysy boıynsha Komıssııa zańsyz ıemdenilgen aktıvterdi memleketke erikti túrde qaıtarý týraly birqatar kelisim jasaýdy maquldady. Arnaýly memlekettik qorǵa qosymsha 150 mlrd teńge baǵyttalady. Sonymen qatar «Zańsyz ıemdenilgen aktıvterdi memleketke qaıtarý týraly» Zań sýbektileri Qazaqstan ekonomıkasyna $10,5 mlrd ınvestıtsııa salý boıynsha mindetteme aldy.

Sonymen qatar Komıssııa «Zańsyz ıemdenilgen aktıvterdi memleketke qaıtarý týraly» QR Zańynyń kúshi qoldanylatyn tulǵalarǵa qatysty jalpy somasy 84 mlrd teńgeden astam aktıvterdi memleket kirisine aınaldyrý týraly sotqa talap-aryz berýdi qoldady.

Osyǵan deıin keıingi úsh jylda elge 1,12 trln teńge zańsyz aktıvter qaıtarylǵany týraly jazdyq.