Zańsyz dinı uıym qurdy degen kúdikpen 17 ózbekstandyq ustaldy

TAShKENT. KAZINFORM – Ózbekstanda 17 adamǵa zańsyz dinı uıym qurdy degen aıyp taǵylyp otyr, dep habarlaıdy Kazinform agenttiginiń menshikti tilshisi.

Memlekettik qaýipsizdik qyzmetiniń málimetinshe, ustalǵandardyń arasynda keden organdarynyń úsh qyzmetkeri, Tashkent memlekettik Shyǵystaný ýnıversıtetiniń stýdenti, tehnopark dırektorynyń orynbasary men jeke kásipkerler bar.

Aldyn ala aqparatqa sáıkes, aıyptalyp otyrǵan top músheleri túngi ýaqytta Tashkenttegi tamaqtaný oryndarynyń birinde jınalyp, túrli dinı ádebıetterdi paıdalana otyryp, pikir almasqan. Kúdiktilerdiń eń kishisi – 24, úlkeni 49 jasta.

Atalǵan fakti negizinde ÓR Qylmystyq kodeksiniń «Qoǵamdyq birlestikter men dinı uıymdardyń qyzmetin zańsyz uıymdastyrý» baby boıynsha qylmystyq is qozǵaldy. Ustalǵan top múshelerine qatysy bar ózge de kúdiktilermen aldyn ala tergeý júrip jatyr.

Qosa ketsek, buǵan deıin Ózbekstan Prezıdenti ákimshiliginiń burynǵy qyzmetkeri Komıl Allamjonovqa jasalǵan qastandyqqa qatysy bar dep aıyptalǵan 10 adamǵa sot úkimi shyqty.

Sonymen qatar, 3-4 aqpan aralyǵynda Ózbekstanda ótken «Qoradorı» («Qara kóknár») operatsııasynyń nátıjesinde esirtki saýdasymen aınalysqan 228 adam qylmystyq jaýapqa tartyldy.