Zańsyz dekrettik tólemderge qatysty 40-qa jýyq qylmystyq is qozǵaldy
ASTANA. KAZINFORM — Elimizde júktilik pen bala týý boıynsha zańsyz áleýmettik tólem alýmen baılanysty 38-den astam qylmystyq is tergelip jatyr. Bul týraly Eńbek jáne halyqty áleýmettik qorǵaý vıtse-mınıstri Vıktorııa Shegaı málim etti.
Májilistiń jalpy otyrysynda, 2025 jylǵy bıýdjettiń atqarylýy týraly Úkimet esebin talqylaý barysynda depýtat Únzıla Shapaq dekrettik tólemderdi taǵaıyndaý kezindegi zań buzýshylyqtar máselesin kóterdi.
Onyń aıtýynsha, Joǵary aýdıtorlyq palata qorytyndysyna sáıkes, júktilik pen bosanýǵa baılanysty áleýmettik tólemderdiń mólsherine zańnamalyq shekteýlerdiń ýaqytyly engizilmeýi saldarynan Memlekettik áleýmettik saqtandyrý qory aktıvteri 67 mlrd teńge kóleminde shyǵynǵa ushyraǵan.
Qarjy mınıstri Mádı Tákıev qazirgi ýaqytta Eńbek jáne halyqty áleýmettik qorǵaý mınıstrliginde ishki aýdıt júrgizilip jatqanyn aıtty.
— Osy aıda aýdıtti aıaqtaımyz. Onyń qorytyndysy boıynsha jazbasha jaýap usynamyz, — dedi mınıstr.
Al Eńbek jáne halyqty áleýmettik qorǵaý vıtse-mınıstr Vıktorııa Shegaı zań buzýshylyqtar qor men Halyqty áleýmettik qorǵaý salasyn retteý jáne baqylaý komıteti júrgizgen tekserýler barysynda anyqtalǵanyn atap ótti.
— Qazaqstannyń 13 óńirinde 38-den astam qylmystyq is qozǵaldy. Barlyq is quqyq qorǵaý organdaryna joldandy. Qazirgi tańda bul ister boıynsha myńnan astam áıelge qatysty tergeý júrgizilýde. Aldyn ala eseptelgen jalpy shyǵyn kólemi 3 mlrd teńgeni quraıdy, — dedi ol.
Onyń aıtýynsha, zańsyz tólem alý shemalaryn uıymdastyrǵan tulǵalarǵa qatysty toǵyz qylmystyq is boıynsha sot úkimderi shyǵarylǵan.
Aıta keteıik, elimizde bala kútimi boıynsha demalys resmı túrde tek analarǵa ǵana emes, ákelerge de teń dárejede qarastyrylǵan.
