Zańsyz aınalymnan 3 tonnadan astam esirtki tárkilendi — UQK

ASTANA. KAZINFORM — «Qara naryqta» tárkilengen esirtkiniń quny 36 mıllıard teńgeden asa baǵalanady, dep habarlaıdy UQK baspasóz qyzmeti.

2024 jyly Ulttyq qaýipsizdik komıteti esirtkiniń zańsyz aınalymyna qarsy is-qımyl sheńberinde 31 halyqaralyq jáne 27 óńirlik jetkizý arnasyn joıyp, 32 jasyryn esirtki zerthanasynyń qyzmetin beıtaraptandyrdy.

— Zańsyz aınalymnan 3 tonnadan astam esirtki jáne psıhotroptyq zattar, 4,5 tonna kóknár sabany shıkizaty jáne «sıntetıka» jasaý úshin qoldanylatyn 18 tonna hımııalyq reagentter tárkilendi. «Qara naryqta» tárkilengen esirtkiniń quny 36 mıllıard teńgeden asa baǵalanady. Esirtki qylmystaryn jasaǵany úshin 164 adam sottaldy. Qazaqstan arqyly esirtkini ákelý jáne tasymaldaý arnalarynyń jolyn kesý boıynsha shet memleketterdiń quzyretti organdarymen 25 halyqaralyq operatsııa júzege asyryldy, — delingen vedomstvo habarlamasynda.

Esirtkiniń zańsyz aınalymyna qarsy kúres boıynsha is-sharalar jalǵasýda.

Aıta keteıik, buǵan deıin Qyzylorda oblysynda 20 mln teńgege baǵalanǵan esirtkini tasymaldaǵan adam ustalǵanyn habarladyq.