Zańsyz aıyppul joıylyp, Jezqazǵan bıýdjetine 212 mıllıon teńge qaıtaryldy

ASTANA. KAZINFORM – Tekserý barysynda 2024 jyly Ekologııa departamenti polıgonda ekologııalyq talaptardy buzǵany úshin Turǵyn úı-kommýnaldyq sharýashylyq bólimine 212 mln teńgeden astam ákimshilik aıyppul salǵany anyqtaldy. 

Ulytaý oblysynyń Mamandandyrylǵan tabıǵat qorǵaý prokýratýrasy Jezqazǵan qalasy ákimdiginiń qyzmetinde ekologııalyq zańnamanyń saqtalýyna tekserý júrgizip jatyr.

— Tekserý barysynda 2024 jyly Ekologııa departamenti polıgonda ekologııalyq talaptardy buzǵany úshin Turǵyn úı-kommýnaldyq sharýashylyq bólimine 212 mln teńgeden astam ákimshilik aıyppul salǵany anyqtaldy. Bul aıyppul zańsyz salynǵan, sebebi 2020 jyldan bastap 2024 jyl aralyǵynda polıgon senimgerlik basqarýǵa berilgen jáne ekologııalyq zańnama talaptaryn saqtaý mindeti senimgerlik basqarýshyǵa júktelgen, — delingen Ulytaý oblysynyń prokýratýrasy habarlamasynda.

Osyǵan baılanysty tabıǵat qorǵaý prokýratýrasynyń narazylyǵy negizinde sot ákimshilik is júrgizýdi toqtatty.

Nátıjesinde joǵaryda atalǵan qarajat jergilikti bıýdjetke qaıtarylyp, aldaǵy ýaqytta Jezqazǵan qalasy turǵyndarynyń qajettilikterine baǵyttalatyn bolady.

Aıta ketelik Balqash qalasynyń prokýratýrasy múmkindigi shekteýli balalardyń úıde oqýǵa járdemaqy alý quqyǵyn qalpyna keltirgen edi.