Zańsyz alynǵan 450 mlrd teńgeniń aktıvi memleketke erikti túrde qaıtaryldy
ASTANA. KAZINFORM – Zańsyz alynǵan 450 mlrd teńgeniń aktıvti memleketke erikti túrde qaıtaryldy. Bul týraly Bas prokýratýranyń Aktıvterdi qaıtarý jónindegi komıteti tóraǵasy Nurdáýlet Súıindikov aıtty.
«Komıtet jumys istep jatqan adamdardyń kópshiligi yntymaqtastyq pen erikti túrde (zańsyz alynǵan aktıvterdi) qaıtarý rásimderine ózderi bastama jasap jatyr. Nátıjesinde búgingi kúnge elimizdiń Premer-Mınıstri jetekshilik etetin arnaýly komıssııa jalpy somasy 450 mlrd teńgege jýyq 40-tan astam kelisim jasaýdy maquldady. Olar zań sýbektilerimen Arnaýly memlekettik qorǵa 300 mlrd teńgeden astam aqsha aýdarýdy kózdeıdi. Onyń 170 mlrd teńgege jýyǵy búginde qor shotyna tústi. Jasalǵan kelisimder boıynsha 100 mlrd teńgeden astam somaǵa aktıvter memleketke zattaı túsedi. 82 mlrd teńgeniń múlki Qaıtarylǵan aktıvterdi basqarý jónindegi kompanııaǵa berilip te qoıdy. Onyń ishinde kásiporyndardyń aktsııalary men úlesteri, kommertsııalyq jáne turǵyn jaılar, elimizdegi jáne sheteldegi tańdaýly jyljymaıtyn múlik, sondaı-aq jer ýchaskeleri, zergerlik buıymdar, sándik zattar jáne basqa da qundy múlik bar», - dedi komıtet tóraǵasy Ortalyq kommýnıkatsııalar qyzmetindegi brıfıngte.
Onyń atap ótýinshe, olardyń ótimdiligi joǵary jáne naryqta úlken suranysqa ıe. Bul óz kezeginde memleketke alynatyn qarjylyq paıdany arttyrady
«Mysaly, Almatyda 176 mln teńgege baǵalanyp, memleketke qaıtarylǵan jer ýchaskesi jaqynda 657 mln teńgege, ıaǵnı 4 ese joǵary baǵaǵa satyldy. Barlyq túsken qarajat áleýmettik jáne ekonomıkalyq jobalardy qarjylandyrýǵa jumsalady», - dedi Nurdáýlet Súıindikov.
