Zańsyz aktıvterdi elge qaıtarý jurtqa jaǵý úshin jasalǵan saıası naýqan emes - Prezıdent

ASTANA. KAZINFORM – Zańsyz aktıvterdi elge qaıtarý arqyly áleýmettik ádildikti qalpyna keltirý – konıýktýra ne bolmasa jurtqa jaǵý úshin jasalǵan saıası naýqan emes.  Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.

Suhbat barysynda Prezıdent zańsyz aktıvterdi elge qaıtarý taqyryby áli jabylmaǵanyn aıtty.

– Árıne, joq. Bas prokýratýranyń málimetterine toqtalyp óteıin. Zańsyz aktıvterdi elge qaıtarý jónindegi komıtet úlken jumys atqaryp, olıgopolııa ókilderinen 1,3 trıllıon teńgeden astam qarjy óndirip aldy. Sonyń 1 trıllıon teńgeden astamy memleket qazynasyna tústi. Arnaıy memlekettik qordaǵy qarajat esebinen elimizde jalpy quny 482 mıllıard teńge bolatyn 434 áleýmettik jáne kommýnaldyq nysan salynyp jatyr. Onyń qatarynda 227 sýmen qamtamasyz etý, 183 densaýlyq saqtaý, 11 bilim berý, 5 sport, 8 ınfraqurylym nysanynyń qurylysy bar. Sondaı-aq, Pavlodar, Arqalyq, Balqash qalalaryndaǵy áýejaılar jańǵyrtylyp jatyr, - dedi Memleket basmshysy.

Qasym-Jomart Toqaev jumys jalǵasa beretinin basa aıtty.

- Aktıvterdi saraptap, onyń zańdylyǵyn anyqtaý quzyrly organdardyń kúndelikti qyzmetiniń bir baǵytyna aınaldy. Eń bastysy, barlyq jumys ashyq ári ádil bolýǵa tıis. Endi bul sharýany bir ortalyqtan úılestirip júrgizýdiń qajeti joq. Jumys bir qalypqa tústi. Sondyqtan alǵa qadam basyp, ınvestorlardyń quqyǵyn qorǵaýǵa basa mán beretin kez keldi, - dedi Prezıdent.

Memleket basshysynyń aıtýynsha, aktıvteri kúmán týdyryp, kúdikke ilingen adamdardyń kóbi qarjysyn elge ınvestıtsııa retinde salýǵa nıet bildirdi. Olarmen jalpy somasy bes trıllıon teńgeden asatyn kelisimder jasaldy.

- Bul qarajattyń esebinen ınvestıtsııalyq jáne áleýmettik jobalardy júzege asyrýdy josparlap otyrmyz. Onyń ishinde týrıstik, kólik-logıstıkalyq ortalyqtar, taý-ken, metallýrgııa, energetıka sektorlaryna qatysty jobalar bar. Álbette, bilim berý, densaýlyq saqtaý, mádenıet, sport salalaryna, sondaı-aq, muqtaj jandardy ońaltý jáne áleýmettik ortaǵa beıimdeý baǵdarlamalaryn qarjylandyrýǵa aıryqsha nazar aýdarylady. Bas prokýratýra men Úkimettiń aldynda barlyq josparlardy jáne ýaǵdalastyqtardy oryndaý mindeti tur. Bul – asa mańyzdy jumys.

Prezıdenttiń paıymynsha, zańsyz aktıvterdi elge qaıtarý arqyly áleýmettik ádildikti qalpyna keltirý – konıýktýra ne bolmasa jurtqa jaǵý úshin jasalǵan saıası naýqan emes, bul – memlekettiń myzǵymas ustanymy. Áńgime ındýlgentsııa nemese ymyralasyp, astyrtyn kelisim jasaý týraly bolyp otyrǵan joq, olaı bolýy múldem múmkin emes.

- Qazaqstan álem qaýymdastyǵyna halyqaralyq quqyqty qatań saqtaıtyn el ekenin kórsetip keledi. Biraq keıbir «kásipkerler» qoǵamdyq pikirdi óz múddesine qaraı burmalaýǵa tyrysady, shetelde jatyp alyp, ózderin saıası rejımniń qurbany etip kórsetedi, «ınvestor» retindegi quqyǵy taptalyp jatqanyn aıtady. Biz zań aıasynda adal dıalog júrgizýge daıynbyz. Óıtkeni ustanymdarymyzdyń durys ekenine senimdimiz. Qazaqstan aldaǵy ýaqytta da zańdary ınvestorlarǵa qolaıly memleket retindegi mártebesin nyǵaıta beredi, - dedi Qasym-Jomart Toqaev.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.