Zańsyz aktıvter: Úsh jylda 1 trıllıon teńgeden astam qarjy qaıtaryldy

ASTANA. KAZINFORM – 2022 jyldan beri memleketke jáne kvazımemlekettik sektor sýbektilerine 1 trıllıon 130 mıllıard teńgeden astam aktıv qaıtaryldy. Bul týraly Sybaılas jemqorlyqqa qarsy qyzmettiń resmı ókili Danııar Bıgaıdarov aıtty. 

Onyń aıtýynsha, zańsyz shyǵarylǵan aktıvterdi qaıtarý – Sybaılas jemqorlyqqa qarsy qyzmettiń negizgi mindetteriniń biri. Bul jumys Memleket basshysynyń tapsyrmalaryn iske asyrý aıasynda Follow the money qaǵıdatymen júrgizilýde.

Aktıvterdiń edáýir bóligi shetelden qaıtaryldy. Mundaı aktıvterdiń somasy 670 mıllıon AQSh dollaryn qurady. Bul shamamen 300 mıllıard teńgege jýyq aqsha. Onyń ishinde Aýstrııa, Lıhtenshteın, BAÁ, Túrkııadan qaıtarylǵan aqsha bar.

− Qylmystyq jolmen alynǵan aqshalaı qarajat pen múlikti izdeý jumystary el ishinde de, shet elde de júrgizilýde. Bul maqsatta Qarjy monıtorıngi agenttiginiń Qarjylyq barlaý bólimshesimen jáne halyqaralyq áriptestermen tyǵyz yntymaqtastyq ornatylǵan. «GlobE», «CARIN», «ARIN» jáne basqa da beıresmı baılanys arnalary paıdalanylyp, aktıvterdi jedel anyqtaýǵa jáne qaıtarýǵa múmkindik berdi. Osyǵan uqsas jumystar óńirlik departamentterde júrgizilip jatyr, - dedi D. Bıgaıdarov Sybaılas jemqorlyqqa qarsy qyzmette ótken brıfıngide.

Jalpy, qarjylyq tergeý kezinde kúdiktilerdiń týystaryna, senimdi adamdarǵa jáne jıi nomınaldy menshik ıeleri retinde paıdalanylatyn basqa tulǵalarǵa rásimdelgen aktıvter tekseriledi.

− Ádette, olar múlik pen ony satyp alýǵa jumsalǵan qarajattyń zańdy shyǵý tegin dáleldeı almaıdy, al olardyń resmı tabysy aktıvter qunynan edáýir tómen. Mysaly, ShQO-da sybaılas jemqorlyqqa kúdikti tulǵa qylmystyq jolmen alynǵan qarajatqa avtokólik pen eki páter satyp alyp, jumyssyz týysynyń atyna rásimdegen. Shymkentte memlekettik qyzmetker urlanǵan aqshaǵa zaıybyna elektromobıl satyp alǵan. Jetisý oblysynda qarjylyq tergeý nátıjesinde 2,8 mlrd teńge bolatyn múlik, sonyń ishinde aqsha qarajaty, 6 avtokólik jáne 1 páter anyqtalyp, tárkilendi, - dedi D. Bıgaıdarov.

Aktıvterdi izdeý, tyıym salý jáne qaıtarý jumystaryn júrgizý barysynda olardyń túpkilikti menshik ıelerin anyqtaý, qajetti málimetter men dálelderdi alý boıynsha Bas prokýratýranyń Aktıvterdi qaıtarý komıtetimen jáne basqa da quqyq qorǵaý organdarymen, sonyń ishinde sheteldik quqyq qorǵaý organdarymen tyǵyz ózara is-qımyl orntylǵan.

Mysaly, Aktıvterdi qaıtarý komıtetimen birlesip júrgizilgen jumys nátıjesinde Astana qalasynyń azamattyq ister jónindegi aýdanaralyq sotynyń sheshimimen memleket paıdasyna 5 mlrd teńgeden astam qarjy, zergerlik buıymdar jáne qymbat múlikter qaıtaryldy.

Aıta keteıik, Astana bankiniń burynǵy aktsıoneri Oljas Toqtarovqa syrttaı sot úkimi shyqty.